Харүмафүжи “Оны шилдэг сүмоч” боллоо
Их аварга Хакүхо, ёкозүна Харүмафүжи, озэки Кисэносато нар өрсөлдлөө.
Японы спортын “Хочи шимбүн” сониноос “2016 оны шилдэг сүмо бөх”-ийг шалгарууллаа. Их аварга Хакүхо, ёкозүна Харүмафүжи, озэки Кисэносато гэсэн гурван бөх эцсийн шатанд шалгаран үлдсэнээс сонины зөвлөл Харүмафүжиг “Оны шилдэг сүмоч”-оор тодруулсан байна.
Мэргэжлийн сүмод 1000 дахь даваагаа авсан Хакүхо, 2016 онд хамгийн олон давсан Кисэносато нарыг Харүмафүжи давсан шалтгааныг сонины зөвлөл “Бүтэн жилийн турш өөгүй сайхан барилдсан. Гурван аваргаас ганцаараа бүх тэмцээнд оролцсон” гэж тайлбарласан юм. Баярт мэдээг сонссон Харүмафүжи “Бүх хүч чадлаараа хичээн барилдсаны ач гарлаа. 2016 он том гэмтэлгүй өнгөрсөн. Их баяртай байна. Дохён дээр барилдана гэдэг аз жаргал. Цаашдаа ч хийх ёстой зүйлээ хийж, зүтгэх болно” гэж сэтгэгдлээ илэрхийлжээ.
Шагналыг энэ сарын 8-нд Хацү башёгийн эхний өдөр Кокүгикан ордны дохён дээр гардуулна.