ЖҮДО: 2017 оны хуваарь
Тавдугаар сарын эхний долоо хоногт болдог байсан “Баку Гран-При” гуравдугаар сарын 10-12-нд явагдах болсон.
Олон улсын жүдо бөхийн холбооноос 2017 оны тэмцээн уралдааны хуваарийг батлан гаргалаа. Өнгөрсөн жилтэй харьцуулахад хэд хэдэн өөрчлөлт гарсан байна. Юуны өмнө тавдугаар сарын эхний долоо хоногт болдог байсан Азербайжаны “Баку Гран-При” гуравдугаар сарын 10-12-нд явагдах болсон. Аzerisport.com цахим хуудсанд бичсэнээр тавдугаар сард тус улсад Исламын улсуудын эв нэгдлийн наадам явагдах тул Азербайжаны жүдогийн холбооноос Олон улсын холбоотой зөвлөлдөн, ийнхүү хуваарийг өөрчилжээ. Уламжлал ёсоор 2017 оны анхны том тэмцээн “Парисийн Гран-При” болно. Дараа нь жүдочид Германы “Гран-При Дюссельдорф”-д очоод Бакуг зорих юм. Энэ жилийн олон улсын тэмцээн уралдаан сүүлийн жилүүдийг бодвол шахуу биш байгаа. Дараагийн олимпийн наадам хүртэл зай байгаа тул чансааны оноо өгөх олон тэмцээн явуулах шаардлага байхгүй.
2017 онд жүдогийн том тэмцээн зохион байгуулах орнуудын дунд Өмнөд Солонгос байхгүй ч Хойд Солонгос гарч ирсэн. Пхеньянд идэрчүүдийн ДАШТ явагдана. Мэдээж олимпийн наадамгүй жилийн хамгийн том тэмцээн бол ДАШТ. Насанд хүрэгчид Унгарын нийслэл Будапештэд, залуучууд Чилид өрсөлдөнө.
Энэ жил нийт таван “Их Дуулга”, таван “Гран-При” явагдаж, уламжлал ёсоор 12 дугаар сарын 1-3-нд Токиогийн “Их Дуулга”-аар энэ улирал өндөрлөнө.