“Хүн амын 50 хувь нэмэлт тундаа хамрагдвал шар түвшин рүү шилжинэ”
Улаанбаатар хотын захирагч Д.Сумъяабазар өнөөдөр цаг үеийн асуудлаар мэдээлэл хийлээ. Тэрбээр “Нийслэлчүүдийн 50 хувь нь нэмэлт III тунд хамрагдвал ирэх арванхоёрдугаар сарын 15-наас шар түвшинд шилжиж, хотын нийгэм, эдийн засгийн амьдралыг хэвийн түвшинд шилжүүлэх боломжтой” гэв. Мөн дээрх мэдээллийнхээ үеэр нийслэлд 150 гаруй мянган аж ахуй нэгж үйл ажиллагаа явуулдаг ч хувийн хэвшлийнхэн үйл ажиллагаа явуулахад хүндрэл учруулдаг зүйлс олон бийг дурдаад цар тахлын улмаас эдийн засгийн хүндрэлтэй нүүр тулсан аж ахуй нэгжүүдэд төрийн дарамтаас ангид үйл ажиллагаа явуулах таатай орчинг бүрдүүлэх бодлого боловсруулж буйгаа танилцууллаа.
Засгийн газраас энэ оны хоёрдугаар сарын 21-нд баталсан “Коронавируст халдвар /Ковид-19/-ын тархалтын түвшин тогтоож, төрийн байгууллага, иргэн, хуулийн этгээдийн үйл ажиллагааг зохицуулах түр журам”-д Шар түвшинд шилжсэнээр уралдаан тэмцээн, гэр бүлийн аялал зугаалгаас бусад аялал зугаалга, үзэсгэлэн худалдаа, диско баар, цахим болон хүүхдийн тоглоомын газраас бусад үйл ажиллагаа явуулахыг зөвшөөрнө гэж тусгажээ.