1 мин

Ипотекийн зээлийг зургаан сараар сунгах талаар Сангийн сайд тайлбарлалаа

Б.Энхцэцэг 2021.12.22 1

Засгийн газар Цар тахлын хуулийг зургаан сараар сунгах саналыг өнөөдөр УИХ-д хүргүүлэхээр шийдсэнтэй холбогдуулан ипотекийн зээлийг зургаан сараар хойшлуулах асуудлаар Сангийн сайд Б.Жавхлан өнөөдөр мэдээлэл хийлээ

Сангийн сайд Б.Жавхлан "Одоо хүчин төгөлдөр хэрэгжиж буй хуульд ипотекийн зээлийн үндсэн төлбөр болон хүүг хуулийн үйлчлэх хугацаанд сунгаж болно гэж тусгасан. Энэ заалт хэвээрээ, зургаан сараар сунгах саналыг Засгийн газар өргөн барьж байна. Зээлдэгчдийн хувьд энэ хугацаанд үндсэн төлбөр, хүүгээ төлж болно. Тэгснээр зээлийн хугацаа нь хойшлохгүй, харин өөрсдийн нэр дээр өмчилж авах хугацаа наашилна гэсэн үг” гэв.

Монголбанкнаас ипотекийн зээлийн эргэн төлөлтийг 2022 оны нэгдүгээр сарын 1-нээс төлж эхэлнэ гэсэн мэдэгдэл хийснийг Сангийн сайд мөн тайлбарлалаа. “Банкны системд хяналт тавьж буй институцын хувьд тийм мэдэгдэл хийхээс аргагүй. Гэхдээ Засгийн газар өөрийн бүрэн эрхийн хүрээнд ипотекийн зээлийг сунгах санал гаргасан. Бид энэ саналаа ч дэмжинэ. УИХ дахь МАН-ын бүлэг ч дэмжихээ илэрхийлсэн” хэмээлээ.

Б.Энхцэцэг 2021.12.22