1 мин

М.Намуун, О.Есүгэн нар өнөөдөр боксын ДАШТ-д медалийн төлөө тулалдана

У.Чинзориг 2022.05.16

4

Боксын эмэгтэйчүүдийн насанд хүрэгчдийн ДАШТ Туркийн Истанбул хотноо найм дахь өдрөө үргэлжилж байна. Уг тэмцээнд монгол улсаас Б.Пүрэв-Очир, Т.Чулуунтөмөр, С.Баттулга дасгалжуулагчтай 10 тамирчин оролцож буй юм. Өнөөдөр 54 кг-д О.Есүгэн Тайландын тамирчин Прийдакамон Тинтбтайтай, 57 кг-д М.Намуун Энэтхэгийн Манишатай хүрэл медалийн төлөө тулалдана.

Монхорын Намуун боксын өсвөр үе, залуучуудын ДАШТ-ээс хүрэл медаль авч байсан билээ. Мөн тэрбээр он гарснаар 22 хүртэлх насны боксын Азийн АШТ-ээс мөнгөн медаль авч, УАШТ-д түрүүлээд буй юм.

О.Есүгэн эхний тойрогт Мехсикийн тамирчин К.Фернандесийг, хоёрдугаар тойрогтоо Энэтхэгийн боксчин Шикша нарыг ялснаар ийнхүү медалийн төлөө тулалдах эрхтэй болоод байна. Тэрбээр УАШТ-д түрүүлж, ДАШТ-д тулалдах эрхээ авсан.

Боксын эмэгтэйчүүдийн ДАШТ-ээс медаль хүртсэн Монголын цорын ганц тамирчин бол М.Нандинцэцэг билээ. Тэрбээр 2018 онд Энэтхэгт болсон ДАШТ-ий 54 кг-ын жинд хүрэл медаль хүртэж байв.

У.Чинзориг 2022.05.16

4