МУГТ Э.Содномпилжээ пара пауэрлифтингийн Европын АШТ-ээс алтан медаль хүртлээ
Гүржийн Тбилис хотноо пара пауэрлифтингийн Европын АШТ IX сарын 22-30-нд зохион байгуулагдаж байна. Тус тэмцээнд Монгол Улсаас гавьяат дасгалжуулагч Д.Баттулгын удирдлага дор “Токио-2020” паралимпын наадмын аварга, дэлхийн хошой алтан медальт, Хөдөлмөрийн баатар, МУГТ Э.Содномпилжээ өрсөлдсөн юм.
Тэрээр тэмцээний 107 кг-ын жинд цээжнээс 242 кг-ыг шахсанаар алтан медаль хүртжээ.
Э.Содномпилжээ өнгөрсөн хавар пауэрлифтингийн IPF холбооны хэвтээ шахалтын ДАШТ-нд цээжнээс 260 кг-ыг шахсанаар дэлхийн аварга болсны сацуу дэлхийн дээд амжилтыг шинэчлэн тогтоосон юм. Тэрээр мөн 105 кг-ын жинд дэлхийн дээд амжилтыг эзэмшиж буй.
Э.Содномпилжээ IPF төрөлд ДАШТ-ий хоёр алт, нэг мөнгөн медальтай, түүнчлэн пара төрөлд ДАШТ-ий нэг алт, хоёр мөнгөн медальтай. Есөн удаа дэлхийн рекордыг шинэчлээд байгаа юм.