1 мин

Сербийн хөлбөмбөгчид Неймарийг хамгаалахын тулд есөн удаа алдаа гаргажээ

У.Чинзориг 2022.11.25

Хөлбөмбөгийн дэлхийн АШТ-ий хэсгийн шатны эхний тойргийн сүүлийн тоглолт Серби - Бразилын хооронд явагдаж Ричарлисон хоёр гоол оруулсан юм. Тэрээр Бразилын шигшээ баг дэлхийн АШТ-ий бүрэлдэхүүнээ зарлахаас гурван долоо хоногийн өмнө бэртлийн улмаас таягтай алхаж байсан ч сонгогдож чадсан билээ. Угтаа дасгалжуулагч Тите түүнийг багтаа тоглуулахын тулд "Би хэзээ ч бэртэлтэй тоглогч сонгож эрсдэл гаргахгүй" хэмээсэн үгээ зөрчихөд хүрсэн юм. Харин Ричарлисон түүний итгэлийг дааж, Фирминогийн оронд Катарт ирснийхээ эхний гавьяаг ийн байгуулав.

Харин Бразилийн шигшээ багийн гол тоглогч Неймар тоглолтын 80 дахь минутад шагай нь хавдсан байдалтайгаар талбайг чөлөөлсөн билээ. Түүнийг хамгаалахын тулд Сербийн хөлбөмбөгчид нийт есөн удаа алдаа гаргажээ. Энэ нь одоогоор дэлхийн аваргад тоглосон хөлбөмбөгчдөөс хамгийн олон алдааг өөртөө аваад буй үзүүлэлт юм.

Неймарийн хувийн ур чадвар болоод бөмбөгтэй тоглолт сайн учир түүнийг олуулаа нийлж хамгаалах эсвэл алдаа гаргаж зогсоохоос өөр аргагүй.

Бразилын шигшээ багийн дасгалжуулагч Тите түүний бэртлийн талаар "Санаа зоволтгүй, Неймар дэлхийн аваргад үргэлжлүүлэн тоглоно, үүнд итгэлтэй байж болно" гэжээ. Харин Неймар өөрийн биеийн байдлын талаар тайлбар хийхийг хүсээгүй аж.