1 мин

Чансааны оноо олгох "Загреб Опен" тэмцээнээс Т.Тулга алт, Н.Наранхүү мөнгөн медаль хүртлээ

У.Чинзориг 2023.02.02

Дэлхийн чансааны оноо олгох бөхийн төрлүүдийн “Загреб Опен” тэмцээн өчигдөр Хорватын нийслэлд эхэллээ. Дэлхийн бөхийн нэгдсэн холбооноос энэ жил чансааны оноо олгох дөрвөн тэмцээнийг зохион байгуулах юм. Тэмцээний аваргууд 1500 швейцар франк, мөнгөн медальт бөх 750, хүрэл медалийн эзэд 500 франкийн шагналтай. 

“Загреб Опен” тэмцээний эхний өдөр эрэгтэйчүүдийн 57, 61, 65, 70, 74, 86 кг-ын жингийн барилдаанууд явагдаж, Монголын гурван бөх барилдснаас 65 кг-ын жинд “Осло-2021” ДАШТ-ий хүрэл медальт Т.Тулга алтан медаль, 61 кг-д 23 хүртэлх нас болон насанд хүрэгчдийн ДАШТ-ий хүрэл медальт Н.Наранхүү мөнгөн медаль хүртэв. Харин ОУХМ Э.Тэмүүлэн 70 кг-д хүрэл медалийн төлөөх барилдаж Гүржийн Георгий Элбакидзед 2:8-аар ялагджээ.

Өнөөдөр эрэгтэйчүүдийн 92 кг-д 23 хүртэлх насны ДАШТ-ий хүрэл медальт ОУХМ Г.Ганхуяг, эмэгтэйчүүдийн 50 кг-д ДАШТ-ий мөнгө, хүрэл медальт гавьяат тамирчин Д.Отгонжаргал нар барилдана.

У.Чинзориг 2023.02.02