Аль-Хилал "Фламенго"-г хожиж, Клубуудын ДАШТ-ий финалд шалгарлаа
Өнөө жил 19 дэх удаагаа зохион байгуулагдаж буй клубуудын ДАШТ 2-р сарын 1-11-ний өдрүүдэд Мароккод явагдаж байна. Уг тэмцээнд тив тивийн клубийн түвшний Аваргуудын лигүүдэд түрүүлсэн зургаан клуб өрсөлдөж буй юм.
Ази тивийг төлөөлөн оролцсон Саудын Арабын Аль-Хилал клуб өнгөрсөн шөнө "Фламенго"-г 3:2-оор хожсоноор түүхэндээ анх удаа тус тэмцээний финалд шалгарлаа.
Саудын Арабын тэрбумтан хунтайж Аль Валид бин Талал Аль Сауд финалд шалгарсан Аль-Хилал багийн тоглогч тус бүрт нэг сая риал (222 мянган фунт стерлинг)-ийг амлаж, хэрэв уг тэмцээнд түрүүлбэл нэмж нэг саяыг амласан байна.
Аль-Хилал финалд Египетийн Аль Ахли болон Испанийн Реал Мадрид клубуудын аль хожсонтой нь 2-р сарын 11-нд тоглох юм.