Герман, ИХ Британи, АНУ-ын судлаачид 20 мянган хүнийг хамруулсан судалгаагаараа айлын том хүүхдүүд илүү өндөр IQ-тай байх хандлагатай байдгийг нотолжээ. Айлын анхны хүүхэд гэдэг маш олон давуу талыг олж авдаг байна. Эцэг эх нь анхны хүүхдэдээ илүү их цагийг тулж зарцуулдаг бөгөөд ганц хүүхдэдээ нэн түрүүнд бүхнийг зориулах, зарцуулах, хийж өгөх хандлага илүү ажиглагддаг байна. Яваандаа дүүтэй болох үед мэдээж хэрэг анхаарал нь илүү олон хүүхэд дээр зэрэг төвлөрч эхлэх шаардлагатай болдог тул анхны хүүхэд илүү их зүйлийг хэдийнээ мэдэрч, ойлгож, хүртсэн байдаг байна.
Айлын том хүүхдүүдийн IQ дүү нарынхаас нь 1.5 оноогоор илүү байх нь түгээмэл гэнэ. Тэд илүү амьдралын ухаан, туршлагатай болж өсдөг ба дүү нартаа хүртэл анхаарал халамж тавихад оролцдог тул багаасаа бие даасан, тэргүүлэгч, чиглүүлэгч үүргүүдийг гүйцэтгэж ирдэг. Мөн айлын том хүүхдүүдийн боловсролд эцэг эх нь маш ихээр анхаардаг бөгөөд бусад дүү нараасаа түрүүнд шилдэг, үнэтэй их сургуульд сурах нь их.
Айлын том хүүхдүүд дээр эцэг эх нь янз бүрийн алдаа оноо гаргах, өсгөх явцдаа хамтдаа "том болох, төлөвших" үйл явц ч мөн их анзаарагддаг тул тэд илүү их сорилттой нүүр тулах болдог. Анх удаа эцэг эх байж үзэж байгаа хүмүүсийн хувьд хүүхэд өсгөх тал дээр туршлагагүй байх тал анзаарагдана. Энэ бүхнээс айлын эхний хүүхэд амьдралын ухааныг илүүтэй суралцаж байдаг. Гэхдээ бас эцэг эхчүүд эхний хүүхэд дээрээ яг таг зөв хүмүүжлийн арга баримтлахыг илүүд үзэх бөгөөд бүхнийг зөв хийхийн төлөө ихээхэн хүч чадал зарцуулж, эхний хүүхдэдээ олон зүйлийг туршиж үзэх, хамтдаа хийж үзэх нь их ажээ.
Эх сурвалж: The New York Times, Studyfinds.org
