мин

Хүнс, хөдөө аж ахуй, хөнгөн үйлдвэрийн яамнаас уриалга гаргажээ

Бид энэ жил арвин ургац авсан ч богино хугацаанд хураах шаардлагатай

Э.Намуун 2016.08.24 30 17 6

Хүнс, хөдөө аж ахуй, хөнгөн үйлдвэрийн яамнаас ард иргэд, оюутан залууст хандаж уриалга гаргасан байна. Энэ онд манай улс арвин ургац хураан авах боломж бүрдсэн ч  Ус, цаг уур, орчны судалгаа мэдээллийн хүрээлэнгээс найм, есдүгээр саруудад хур тунадас ахиу орж, эрт сэрүүсэх төлөвтэй хэмээн мэдээлсэн. Тиймээс сайн дураар туслах, “Орлоготой оюутан” хөтөлбөрт хамрагдах, газар тариалан эрхэлдэг аж ахуйн нэгжүүдтэй гэрээ байгуулан хамтран ажиллаж, ургацаа богино хугацаанд хорогдол, хаягдалгүй хураан авах ажилд иргэд, оюутан, залуучууд идэвх санаачлагатай оролцохыг уриалжээ. Мөн газар тариалан эрхэлж буй аж ахуйн нэгжүүд энэхүү уриалгыг дэмжиж иргэд, оюутан залуучуудынхаа идэвх санаачлагыг хүлээн авч үр ашигтай хамтран ажиллана гэдэгт итгэж буйгаа тус яамны сайд П.Сэргэлэн онцолсон байна.
Энэ жил улсын хэмжээгээр 375.3 мянган га талбайд үр тариа, 22.0 мянган га талбайд төмс, хүнсний ногоо, 63.8 мянган га талбайд тосны ургамал, 25.3 мянган га талбайд тэжээлийн ургамал, 4.2 мянган га талбайд эмийн ургамал нийт 491.2 мянган га талбайд хураалтын ажлыг зохион байгуулахаар бэлтгэлээ хангажээ. Үүнтэй холбогдуулан Хүнс, хөдөө аж ахуй, хөнгөн үйлдвэрийн яаманд ургац хураалтын ажлыг удирдан зохион байгуулах үүрэг бүхий Улсын ургацын комисс, орон нутагт салбар комиссуудыг шинэчлэн байгуулсан аж.

Э.Намуун 2016.08.24