АНУ-ын Элчин сайдын яам хоёр орны хэв маягийг хослуулсан гэртэй боллоо
Тус гэрийн нээлт өнгөрсөн баасан гаригт болсон юм
Монгол дахь АНУ-ын Элчин сайдын яамны Консулын хэлтэс монгол гэртэй болжээ. Энэхүү гэрийн нээлт өнгөрсөн баасан гаригт болсон бөгөөд виз болон иргэншлийн асуудлаар хандаж буй бүхий л иргэдийг угтан авах зориулалтаар ашиглах юм.
Энэхүү гэрийг Монгол гэрээс санаа авч, АНУ-д өндөр технологиор үйлдвэрлэсэн гэдгийг элчин сайд Женнифер хэлсэн юм. Тэрбээр виз мэдүүлэгч иргэдийг хүйтэн сэрүүний улиралд гадаа даарч, бээрэн хүлээж зогсохоос сэргийлэн ийнхүү хүлээлгийн гэртэй болж буйгаа онцолсон.
Монгол гэр цаг хугацааны шалгуурыг давсан гайхамшигт технологийн нэг юм. Монгол гэрийг хялбархан барьж, буулгаж, нүүлгэж болдог учраас амьдрахад таатай, найдвартай сууц бөгөөд монгол гэртэй ижил төстэй сууц дэлхийн өнцөг булан бүрт бий. Монгол дахь Америкийн элчин сайдын яам монгол гэрийн давуу талыг технологийн дэвшилттэй хослуулан амьдрах орчноо улам бүр байгальд ээлтэй болгохоор зорьсон аж. Монгол гэрийн онцгой дизайн, бусад онцлог шинжийг Америк хэв маягийн шинэчлэлтэй хослуулан барьжээ. Мөн тус гэрийн орчинд тусгайлан сонгосон агаарын бохирдлыг багасгах мод, ургамал тарьж туршиж буй.