300 орчим иргэн номоо солилцлоо
Энэхүү өдөрлөгийг сар бүрийн эхний 7 хоногийн бямба гарагт зохион байгуулна.
Нийслэлийн Соёл, урлагийн газар Д.Нацагдоржийн нэрэмжит Улаанбаатар хотын нийтийн төв номын сантай хамтран “Номоо солилцъё” өдөрлөгийг Сүхбаатарын талбайд өчигдөр зохион байгууллаа.
Номоо солилцохоор төв талбайд хүүхэд, багачууд, залуучууд болон зохиолчид ирсний дотор ахмадууд багагүй байсан бөгөөд өөрийн уншсан номоо бусадтайгаа хуваалцаж, бусдын уншсан номоор солилцох нь энэхүү өдөрлөгийн гол онцлог юм.
Өдөрлөгт 300 орчим хүн ирсний олонх нь түүх, уран зохиолын ном сонирхож байсан бол хамгийн залуу 5 настай уншигч үлгэрийн ном хайж ээж, эгчийн хамт ирсэн байлаа. Мөн өдөрлөгийн үеэр номоо солилцсон хүмүүст Д.Нацагдоржийн нэрэмжит Улаанбаатар хотын нийтийн төв номын сангийн уншигчийн үнэмлэх нээлгэх эрхийн бичгээр урамшуулав.
Энэхүү өдөрлөгийг цаашид сар бүрийн эхний 7 хоногийн бямба гарагт Төв талбайд зохион байгуулах зөвшөөрлийг Нийслэлийн Засаг даргын Тамгын газраас олгосон юм.