Монгол дахь солонгосчууд Ерөнхийлөгч Пак Гын Хег огцрохыг шаардлаа
“Монгол дахь солонгос иргэдийн нийгэмлэг” Сүнжин Гранд зочид буудалд хурал хийлээ.
Өмнөд Солонгосын Ерөнхийлөгч Пак Гын Хег эсэргүүцэн, албан тушаалаасаа буухыг шаардсан жагсаал өчигдөр тус улсад боллоо. Бямба гараг бүр болж байгаа тус жагсаал энэ долоо хоногт 5 дахь удаагаа явагдаж байгаа юм. Энэ сарын 26-нд Сөүлд анхны цас орж, маш хүйтэн, хүчтэй салхитай байсан ч ард иргэд жагсаалд идэвхтэй оролцлоо. Зохион байгуулагчид Сөүлд 1.5 сая, хөдөө орон нутгийн жагсагчдыг оролцуулбал нийт 2 сая хүн болно гэж мэдэгдсэн. Хөдөөний тариачид жагсаалд оролцохоор трактор, машинтайгаа ирж явсан ч Сөүлийн ойролцоо цагдаа нар зогсоож, бага хэмжээний мөргөлдөөн болсон байна. Албан тушаалаа өгөх ямар ч бодолгүй байгаа нь илт Пак Гын Хег эсэргүүцэгч нар “Улс орноо ийм байдалд оруулчихаад албан тушаалаа өгөхгүй байгаа нь хачирхалтай”, “Ажлаа өгөх ёстой. Ийм олон хүн эсэргүүцэж байхад яагаад огцрохгүй байна вэ” хэмээн ярьж байна.
Монголд амьдарч буй Өмнөд Солонгос иргэд мөн Ерөнхийлөгч Пак Гын Хег ажлаа өгөхийг шаардсан эсэргүүцлийн арга хэмжээг өчигдөр зохион байгууллаа. “Монгол дахь солонгос иргэдийн нийгэмлэг” Сүнжин Гранд зочид буудалд тайлангийн хурлаа хийж, нийгэмлэгийн тэргүүнээ сонгосон. Тус нийгэмлэгийн тэргүүнээр Гүг Жүн Ёл сонгогдлоо.
Хурлын дараа Монгол дахь солонгосчууд Ерөнхийлөгч Пак Гын Хег албан тушаалаасаа огцрохыг шаардсан арга хэмжээ зохион байгуулж, эсэргүүцлээ илэрхийлсэн юм. Тэд “Пак Гын Хег нэн даруй ажлаа өгөхийг шаардаж буй Монгол дахь солонгос иргэд” гэсэн зурагт хуудас барьсан байв.