мин

Гар утсанд зориулсан 00-ийн цаас

Хэрэглээд жорлонд урсгахаасаа өмнө лавлахыг нь уншаад, зургийг нь авч болно.

М.Сугар-Эрдэнэ 2016.12.22 35 34 22

Японы харилцаа холбооны “NTT Докомо” компаниас гар утасны 00-ийн цаас зохион бүтээжээ. Одоогийн байдлаар “Нарита” олон улсын нисэх буудлын ариун цэврийн өрөөнүүдэд байрлуулсан бөгөөд 2017 оны гуравдугаар сарын 15 хүртэл турших юм.

Гудамжаар алхаж явахдаа ч гар утсаа оролдож байдаг орчин үеийн хүмүүс 00-д сууж байхдаа ч гар утсаараа тоглож, мэссэж бичиж байдаг. Тэгвэл тэр гар утас нь жорлонгийн суултуураас 5 дахин бохир гэдгийг эрдэмтэд нотолжээ. Энэ судалгаанд үндэслэн, “NTT Докомо” компани ариун цэврийн өрөөнд өөрөөсөө гадна “үнэнч анд” болсон гар утсаа арчиж, цэвэрлэхийг зуршил болгох зорилгоор гар утасны 00-ийн цаас бүтээсэн байна. Мөн Японд ирсэн гадаадын иргэдэд юу хэрэгтэй байдгийг ч судалжээ.

Үнэгүй интернэт, гар утас авах, мөнгө солиулах гээд тэднийг зовоох асуудал мундахгүй. Тэгвэл “Нарита”-д буусан гадаадын жуулчид ариун цэврийн өрөөнд сууж байхдаа л энэ бүх мэдээллийг гар утасны 00-ийн цааснаас авч болно. Цаасан дээр “Докомо” компанийн Wi-Fi үйлчилгээ, газрын зураг, орчуулагч, нийтийн тээврийн лавлагаа англи хэл дээр бичигдсэн байгаа. Хэрэглээд жорлонд урсгахаасаа өмнө лавлахыг нь уншаад, зургийг нь авч болно, үгүй бол таслаад аваад явж ч болно.

М.Сугар-Эрдэнэ 2016.12.22