Фидель Кастрогийн нэрийг ашиглахыг хуулиар хоригложээ
Кубын хувьсгалын их удирдагч Фидель Кастрогийн нэрийг олон нийтийн газар, төрөл бүрийн уралдаан шагнал нэрлэхдээ ашиглахгүй байх тухай хууль баталжээ. Түүнчлэн түүний дүрээр хөшөө дурсгал босгохыг хатуу хориглосон байна. Гэхдээ олон нийтийн байгууллага, албан газар, иргэдийн гэрт өлгөөтэй зургуудыг хэвээр үлдээж болох бөгөөд уран бүтээлчид нэр, хөргийг нь ашиглах боломжтой гэж заажээ. Ф.Кастро нас барахдаа ийн хориглохыг хүссэн аж.
Түүний дүү, Кубын Ерөнхийлөгч Рауль Кастро "Их удирдагчийн дурсгалыг хүндэтгэх зөв арга бол хувьсгалын үйл хэрэг, зарчмыг умартахгүй мөрдөх" хэмээн ярьжээ. Кубын хувьсгалыг эхлүүлж, тус улсыг олон жил залсан Ф.Кастро өнгөрсөн сард өөд болсон билээ.