мин

Японы жүдочид сонгомол барилдааны бэлтгэл хийж байна

Шинэ дүрмээр довтолж барилдах шаардлагатай болсон тул сонгомол барилдааны урлагийг эзэмших хэрэгтэй болжээ.

М.Сугар-Эрдэнэ 2017.01.11

Японы жүдо бөхийн эрэгтэйчүүдийн шигшээ баг энэ сарын 10-наас Токио хотод цугларалтад гарлаа. “Рио 2016” наадмын аварга 90 кг-ын жингийн Машюү Бейкер, +100 кг-ын Харасава Хисаёши тэргүүтэй бөхчүүд сонгомол барилдааны дасгал сургууль хийж байна.
2017 оны уриагаа “Challenge” хэмээн тодорхойлсон шигшээ багийн ахлах дасгалжуулагч Иноүэ Коосэй сонгомол барилдааны бэлтгэл хийх болсон шалтгаанаа “Орчин үеийн жүдод ойрын зайн барилдаан чухал болоод байна. Япончууд зайнаас сайн барилддаг ч барьцтай барилдаанд сул. Тиймээс сонгомол барилдааны бэлтгэл хийж, ур чадвараа сайжруулна” гэж тайлбарласан.

Иноүэ Коосэй өнгөрсөн жил окинава сүмо, монгол бөх, холимог тулааны дасгал хийж байж, “Рио 2016”-д эрэгтэйчүүдийн шигшээ багаа бүх жинд медаль авахуулсан. Олон улсын жүдогийн холбооноос барилдааны хугацааг 5 минутаас 4 болгон богиносгох зэрэг шинэ дүрэм нэвтрүүлээд байгаа. Шинэ дүрмээр довтолж барилдах шаардлагатай болсон тул сонгомол барилдааны урлагийг эзэмших хэрэгтэй болжээ. Японы сонгомол барилдааны шигшээ багийн дасгалжуулагч Тоёота Масатошигийн удирдлага дор бэлтгэл хийсэн Харасава “Хамгаалалтад тун чухал зүйлсийг сурж авлаа. Өнгөрсөн жил монголчууд чөлөөт, сонгомол маягаар иппон их авч байсан” гэж сэтгүүлчдэд ярьсан байна.