1 мин

С.Ням-Очир зодог тайлж, томчууд бүдэрсэн жүдогийн УАШТ

66 кг-ын жингийн шилдгүүд болоx Д.Төмөрхүлэг, А.Батсуурь, дэлхийн аварга Г.Болдбаатар нар бүгд өвдөг шороодсон.

М.Сугар-Эрдэнэ 2017.01.18

Жүдо бөхийн насанд хүрэгчдийн эрэгтэй 40, эмэгтэй 25, багийн 5 дахь удаагийн УАШТ энэ сарын 16-17-нд СТО-д явагдлаа. Энэ тэмцээнээс улсын шигшээ багийг тодруулах байсан тул тамирчдын хувьд тун хариуцлагатай тэмцээн байсан. Олимп, дэлхийн медальтан олон алдартан зодоглосон УАШТ сенсаац дүүрэн явагдаж өнгөрлөө.

УАШТ-ий үеэр Монголын шилдэг жүдочдын нэг, Гавьяат тамирчин С.Ням-Очир их спортоос зодог тайлснаа албан ёсоор зарлалаа. С.Ням-Очир цаашдаа дасгалжуулагчийн ажилд хүч сорино гэдгээ мэдэгдсэн. Олимпийн хүрэл, ДАШТ-ий хүрэл медалиас гадна Олон улсын жүдо бөхийн холбооноос зохион байгуулдаг Их дуулга, Гран При бүх тэмцээний медаль түүнд бий.

УАШТ-ий +100 кг-ын жинд 24 бөх барилдсанаас 2008 оны олимпийн аварга Н.Түвшинбаяр анх удаагаа энэ жинд барилдаж, түрүүллээ. Аварга хүн аварга л байдаг юм байна.

“Рио 2016” наадамд 60 кг-ын жинд барилдсан Ц.Цогтбаатар жин ахиж, 73 кг-д барилдаад хүрэл медаль хүртлээ.

УАШТ-ий 66 кг-ын жингийн шилдгүүд болоx Д.Төмөрхүлэг, А.Батсуурь, дэлхийн аварга Г.Болдбаатар нар бүгд өвдөг шороодсон. Энэ жинд Г.Хэрлэн түрүүлжээ.

Хамгийн олон бөх хүч үзсэн 60 кг-ын жинд мөн сенсаац. Гол фаворит дэлхийн аваргын мөнгөн медальт Д.Амартүвшин ялагдаж, 20 настай залуу тамирчин Ж.Амарболд шинэ аваргаар тодорлоо.