Бичлэг: Асахирюү Ишибашид уналаа
Ишибаши ёрикири мэхээр ялж, макүшита зиндаанд түрүүллээ.
Макүшита зиндааг 6 ялалттай тэргүүлж явсан манай бөх Асахирюү макүшитагийн баруун жигүүрийн 30-д бичигдсэн Ишибаши нар өнөөдөр халз барилдлаа. Ишибаши бол сонирхогчдын сүмогийн Бүх Японы АШТ-д хүрэл медаль хүртэн, санданмэ зиндаанны 100-гаас эхлэн барилдсан бөх.
Хоёр бөхийн барилдаанд Ишибаши ёрикири мэхээр ялж, макүшита зиндаанд түрүүллээ. Сүмогийн холбооны дүрмэнд макүшитагийн 15-аас дээр байгаа бөх 7 ялалттай түрүүлвэл жюүрёод дэвшдэг дүрэмтэй тул тэр Хаврын тэмцээнд жюүрёод барилдах нь тодорхой боллоо.
138 жил сэкитори буюу цолтой бөхтэй байсан Такасаго дэвжээ 2 башё тасалдаад дахин цолтой бөхтэй болж байгаа нь энэ юм. Мөн Тояама мужаас 20 жилийн дараа жюүрёо зиндааны бөх төрөн гарлаа.
Ишибаши “Баяртай байна. Өөрийнхөө төлөө, дэвжээ, төрсөн нутгийнхаа төлөө хичээж барилдлаа. Ирэх тэмцээнд жюүрёод 50 хувийн амжилт үзүүлэхийн төлөө хичээнэ” гэж сэтгүүлчдэд ярьсан байна.