1 мин

“Олимпус”-чууд хүүхдүүдэд спортын буян үйлдлээ

Б.Энхцэцэг 2017.01.20 42 39 19

“Өнөр бүл”, “Манай гэр”, “Бадамлянхуа”, “Хүүхэд, залуусын сургалт, үйлчилгээний төв”-д амьдардаг 300 орчим хүүхдэд өнөөдөр гэнэтийн бэлэг иржээ. Тэдний хүлээн авсан бэлгийн уутанд биеийн тамирын хувцас, хэрэглэл байсан нь хүүхдүүдэд спорт сонирхох, түүгээр хичээллэх, хоорондоо өрсөлдөн аваргалах, өөрийгөө сорих гоё хүсэл мөрөөдлийн хамт очсон нь гарцаагүй. Спорт бол хурд хүч, авхаалж самбаа бөгөөд хүүхдүүдийн чөлөөт цагаа зөв өнгөрөөх, магадгүй ирээдүйн амьдралаа олох сайхан боломж юм. 

“Экстрим стар” ХХК-ийн “Олимпус” спортын бараа, техник, хэрэглэлийн их дэлгүүр, “Олимпус жим” фитнесс клуб өнөөдөр ийнхүү эцэг эхийн анхаарал, халамж дутсан асрах газар, сургалтын төвүүдийн дүү нартаа буяны гараа сунгажээ. “Олимпус”-чууд хүүхэд бүрт спортоор хичээллэх дур сонирхол байдгийг дэмжин, биеийн тамирын хувцас бэлэглэснээс гадна хүүхдүүдийн байгаа төвүүдийг ширээний теннисний иж бүрдэл, сагс, гар, хөлбөмбөгийн бөмбөгүүдтэй болгосон байна.
“Экстрим стар” ХХК нийгмийн өмнө хүлээсэн хариуцлагатай байгууллагын хувьд спортын буяны үйлсийг гурав дахь удаагаа зохион байгуулж байгаа бөгөөд үүний өмнө Улаанчулуутын дунд сургуулийн гадаа өөрсдийн хөрөнгөөр сагсан бөмбөгийн талбай тохижуулж өгчээ. 

Б.Энхцэцэг 2017.01.20