1 мин

Монголын анхны нарны цахилгаан станц ашиглалтад орлоо

Жилд 14.1 сая кВт/цаг эрчим хүч үйлдвэрлэх юм байна.

Э.Намуун 2017.01.23 44 31 26

Дархан-Уул аймгийн нэгдүгээр багийн нутаг дэвсгэрт байрлах 10 мВт хүчин чадал бүхий нарны цахилгаан станцын нээлт боллоо.  

Нээлтийн үйл ажиллагаанд Эрчим хүчний сайд П.Ганхүү, Байгаль орчин, аялал жуулчлалын дэд сайд Ц.Батбаяр, Япон улсаас Монгол улсад суугаа Онц бөгөөд Бүрэн эрхт элчин сайд Мацато Такаока болон аймгийн ИТХ-ын дарга Г.Эрдэнэбат, аймгийн Засаг дарга С.Насанбат зэрэг албаны төлөөллүүд оролцож, хүндэтгэлийн туузыг хайчилсан юм.

Тус нарны станцыг дотоодын “Solar power international”, Японы “Sharp” корпораци, “Shigemitsu shoji” компани хамтран байгуулсан бөгөөд жилд 14.1 сая кВт/цаг эрчим хүч үйлдвэрлэх юм байна.

Энэ нь 20.000 айл өрхийг сэргээгдэх эрчим хүчээр хангах боломжтой гэсэн үг. Улмаар жилд 14.746 тонн хүлэмжийн хий ялгаруулахаас сэргийлэх ач холбогдолтой хэмээн “Solar power international” компанийн гүйцэтгэх захирал Б.Мандалбаяр нээлтийн арга хэмжээний үеэр онцоллоо.
Станцын цахилгааны тоног төхөөрөмжүүд нь манай орны хасах 30-40 хэмийн хүйтэн эрс тэс нөхцөлд найдвартай, өндөр үр ашигтай хэвийн ажиллаж байхаар тооцоолсон бөгөөд Цахилгаан Дамжуулах Үндэсний Сүлжээ компанид эрчим хүч нийлүүлж эхэллээ.

Э.Намуун 2017.01.23