мин

Ван Бастен: Хавсаа, нэмэлт цагийг өөрчилнө

Торгуулсан тоглогч 10 минут талбайгаас гараад эргэн тоглоно.

М.Сугар-Эрдэнэ 2017.01.24 39 36 19

Голландын шигшээ, Италийн “Милан” багийн домог Ван Бастен одоо ФИФА-гийн техникийн захирлаар ажиллаж байна. Цагтаа супер довтлогч байсан Ван Бастен хөлбөмбөгийн дүрмийг өөрчлөх төсөл боловсруулаад байгаа гэнэ. Түүний шинэчлэлийг, тайлбарын хамт танилцуулья.
Тамирчдын оролцох тоглолтын тоог хязгаарлана.
“Хөлбөмбөгчдийн ачааллыг багасгахгүй бол тэд сэргэлт авч амжихгүй байна. Зарим тоглогч жилд 75 тоглолтод оролцож байна. Энэ тоог 60-65 болгох шаардлагатай”
Цаг сунгахыг зогсооно.
“30 минут сунган тоглоход хөлбөмбөгчид маш их ядардаг. Цомын тэмцээнд үндсэн цаг тэнцээгээр өндөрлөхөд шууд 11 метрийн цохилт хийлгэх хэрэгтэй”
Пенальти-буллит.
“11 метрээс цохих нь сонирхолгүй. Тиймээс хаалганаас 25 метрийн зайнаас бөмбөг аваад хаалга руу ойртон цохьдог хоккейн буллит шиг пенальти нэвтрүүлнэ. Гэхдээ найман секундын дотор гүйцэтгэх ёстой. Ийм пенальтид азтай нь биш ур чадвартай нь гоол оруулна. Үзэхэд ч сонирхолтой”
Хавсаа хэрэггүй.
“Хавсаа, оффсайд байхгүй бол хөлбөмбөг сонирхолтой болно. Өнөөгийн хөлбөмбөг гандболтой адилхан байна. Нэг баг нь торгуулийн талбайдаа ес, арвуулаа цуглаж хамгаалаад, нөгөө тал нь тойрч гүйлдээд л. Бүгдээрээ хамгаалаад байхаар гоол хийхэд тун хэцүү. Харин хавсааг цуцлах юм бол гоол их орно”
25 минутаар 4 үе.
“Бид хөлбөмбөгийг шинэчлэн, сайжруулахыг хичээж байна. Үнэнч шударга, эрч хүчтэй, жинхэнэ сайхан тоглолт үзмээр байна. Тэгэхээр үүний төлөө боломжтой бүх зүйлийг хийх хэрэгтэй. 4 үе тогловол тамирчид амарч, сэргэж чадна, дасгалжуулагч ч тоглогчиддоо зөвлөгөө заавар өгөх гурван завсарлагатай болно”

Улбар карт.
“Улаан картны зөрчлөөс бага, шар хуудаснаас их хэмжээний зөрчил гаргасан хөлбөмбөгчийг улбар картаар торгоё. Торгуулсан тоглогч 10 минут талбайгаас гараад эргэн тоглоно. Аюултай биш ч байнга дүрэм зөрчөөд байгаа тамирчинг ингэж торгож болно. Эсвэл таван удаа зөрчил гаргавал улбар карт гээд тогтоож болно”

М.Сугар-Эрдэнэ 2017.01.24