САЙН МЭДЭЭ: Чанаргүй зээлийн хэмжээ буурчээ
Арилжааны банкуудын балансын гол үзүүлэлтэд ямар өөрчлөлт орсон бэ
Монголбанкнаас өнгөрсөн оны арванхоёрдугаар сарын арилжааны банкуудын нэгдсэн тайлангийн гол үзүүлэлтүүдийг танилцуулжээ. Эндээс үзэхэд, арилжааны банкуудын чанаргүй зээлийн хэмжээ өмнөх арваннэгдүгээр сартай харьцуулахад 10 орчим хувиар буурсан байна. Харин үүний эсрэг талд Засгийн газрын үнэт цаасны хэмжээ 3.4 их наяд төгрөгтэй тэнцэж, өмнөх оны мөн үетэй харьцуулахад 37.4, арваннэгдүгээр сараас 11.3 хувиар тус бүр өссөн байна.
Арилжааны банкуудын эзэмшиж байгаа Засгийн газрын үнэт цаасны хэмжээ
Өнгөрсөн оны арванхоёрдугаар сард төгрөгийн зээл нэмэгдэж, валютынх буурсан дүнтэй байна. Тодорхой хэлбэл, төгрөгийн зээл 9.9 их наяд төгрөг болж өмнөх сараас 1 хувиар өссөн бол, валютынх 17 хувиар буурч, 2.3 их наяд төгрөг болжээ.
Гадаад валютын хадгаламж өмнөх оны мөн үеэс 42.8 хувиар өсжээ
Өнгөрсөн арванхоёрдугаар сард гадаад валютын хадгаламж 2.7 их наяд төгрөгтэй тэнцжээ. Энэ нь өмнөх оны мөн үетэй харьцуулбал, 42.8 хувиар өссөн дүн юм. Харин өмнөх сараас 4.1 хувиар өсжээ. Тэгвэл төгрөгийн хадгаламж өмнөх оны мөн үеэс зургаан хувиар дээшилсэн байна.