Таримал цэцэг сонгохдоо анхаарах ёстой ЗУРГААН зүйл
Худалдагчаас сонгосон ургамлынхаа гарал үүсэл, латин болон монгол нэршлийг заавал лавлаарай.
Долоо хоног бүрийн мягмар гарагт МУИС-ийн Экологийн боловсролын төвтэй хамтран, экологи, байгаль орчинтой холбоотой мэдээлэл, зөвлөгөө хүргэж байгаа билээ. Ээлжит мэдээллээрээ таримал ургамал сонгохдоо юуг анхаарах ёстойг зөвлөж байна.
Хэрвээ та дэлгүүрээс цэцэг авах гэж байгаа бол худалдагчаас гарал үүсэл, латин болон монгол нэршил, арчилгааны онцлог, хэр хэмжээтэй томорч ургах талаар маш сайн асууж лавлах хэрэгтэй.
“Цэцэг аваад үхүүлчихлээ” гэж ярьдаг хүмүүс цөөнгүй байдаг. Учир нь авсан цэцэг, ургамлынхаа талаар мэдээлэл аваагүй, өөрийнхөө таамгаар арчилсан тохиолдол олон. Тодорхой мэдээлэлгүй бол интернэтээс мэдээлэл авах боломжтой бидэнд нээлттэй бий.
Мөн ургамал, цэцгийн тухай тодорхой мэдээлэл өгч чадах хувь хүн, мэргэжлийн байгууллагаас худалдан авахыг чухалчилаарай. Холбоо барих утас, хаягийг авахаа ч мартуузай. Учир нь асуудал тулгарсан үед эргэн холбогдоход амар шүү дээ.
Ингээд ургамал, цэцгээ хаанаас авахаас үл хамааран дараах зургаан зүйлийг анхаараарай.
1. Тахийж мурийгаагүй зөв хэлбэртэй ургасан, навч нь эрүүл өнгөлөг ургамал сонгоорой.
2. Хортон шавьж навчин дор байрладаг тул навчийг эргүүлэн харж өндөг, авгалдай байгаа эсэхийг заавал шалгах хэрэгтэй.
3. Цэцэглэдэг ургамлыг олон цэцэгтэй гэхээсээ илүү олон бундуйтайг сонгох нь чухал. Ингэснээр тухайн ургамал гэрт тань илүү удаан хугацаанд цэцэгтэй байна.
4. Ишний ёроол харлаагүй, зөөлрөөгүй байх ёстойг анхаараарай. Учир нь ургамалд ишний ёроолоос эхэлж мууддаг мөөгөнцрийн гаралтай өвчин байдаг.
5. Манай эрс тэс уур амьсгалтай орчны арчилгаанд дасан зохицож амжаагүй, гадаадаас дөнгөж оруулж ирсэн цэцэг авахаас зайлсхийгээрэй.
6. Авсан цэцгээ гэр хүртлээ хурц нар, аадар бороо, хүйтнээс хамгаалж заавал кордонон хайрцаг, саванд хийгээрэй.
Холбоотой мэдээллийг энд дарж, уншина уу.