Жүдо бөх холимог тулаанаас өөр үнэт зүйлстэй
Нутгийн тамирчдад илүү ханддаг явдал жүдод байхгүй.
Олон улсын жүдо бөхийн холбооны ерөнхийлөгч Мариус Визер бөх сонирхогчидтой нээлттэй харилцаж, ил тод ярилцахыг эрхэмлэдэг нэгэн. Францын нийслэлд болсон “Их Дуулга” тэмцээний дараа тэрбээр онлайн хурал зохион байгуулж, бөхийн хорхойтнуудын асуултанд хариулсан юм.
-Жүдо хэзээ нэгэн цагт холимог тулаан шиг олны сонирхлыг татаж чадах болов уу. Тийм зорилго, бодлого байгаа юу?
-Жүдо бөх огт өөр үнэт зүйлстэй. Бид тэмцээн уралдаанаас орж ирсэн мөнгийг буцаагаад спортод оруулдаг. Манайх шоу, арилжааны байгууллага биш.
-Спортын бусад холбоод IJF-ийг даган дууриаж, цуврал Гран При тэмцээнүүд зохион байгуулдаг болсныг юу гэж үзэж байна вэ?
-Жүдо бөхийн хөгжил, дэвшлийг харсан бусад холбоод манай хөгжлийн стратегийг дагахийг хичээж байгааг би мэднэ.
-Дүрмийн шинэчлэл тамирчдад таалагдсан болов уу?
-Тамирчдаас дэмжсэн, сайшаасан зүйл олон сонссон. Ер нь тамирчдаас гадна жүдотой холбоотой бүх хүн шинэ дүрмийг ойлгож, дасан зохицоход цаг хугацаа хэрэгтэй гэдгийг би ойлгож байна.
-Яагаад IJF цэрэг, цагдаагийнхантай их хамтран ажилладаг юм бэ?
-Би өөрөө цэрэг байсан хүн. Жүдо бөх армийн байлдааны чадварт сайн нөлөөтэйг ойлгож байгаа болохоор тэдэнтэй холбоотой байдаг. Үнэнийг хэлэхэд олон тамирчин спорт хөөгөөд дээд боловсролтой болж амжаагүй байдаг. Тийм болохоор хүчний байгууллагуудтай хамтран ажилласнаар тамирчдаа зодог тайлсан хойно нь ажилд оруулах бас нэгэн зорилго байгаа юм.
-Хойд Солонгост болох ДАШТ-д бүх улс оролцоно гэж бодож байна уу?
-Одоогийн байдлаар бид энэ асуудлыг судлаж байгаа. Ямар ч шийдвэр гараагүй.
-“Парисын Их Дуулга” тэмцээний зохион байгуулалт таалагдсан уу? Франц улсад 2024 оны олимпийн наадмыг өгвөл яах бол?
-Сонгоход хэцүү байна. Би өөрөө Будапешт хотын хүн. Надад Лос-Анжелесийн мэдүүлэг сонирхолтой санагдаад байгаа.
-Яагаад Нээлттэй цомын тэмцээнд IJF-ийн тэмцээнээс бага оноо өгдөг болов?
-Яагаад гэвэл IJF хөрөнгө оруулалт, хэвлэл мэдээлэл, хөгжөөн дэмжигчид, зохион байгуулалтын тогтвортой системтэй. Харин Нээлттэй тэмцээнүүдэд ийм зүйл байхгүй.
-Зохион байгуулагч нутгийн тамирчдад шүүлт илүү зөөлөн ханддаг явдал байна уу? Яаж үүнтэй тэмцэх вэ?
-Жүдод тийм зүйл байхгүй.
Олон улсын жүдо бөхийн холбооны ерөнхийлөгч Мариус Визерийн бүх хариултыг түүний албан ёсны твиттер хуудаснаас үзнэ үү.