Ким Жон Уны ах алагджээ
Ким Чен Нам хорлогдсон нь тодорхой болжээ.
Хойд Солонгосын залуу удирдагчийн төрсөн ах Ким Чен Нам Куала-Лумпурт өчигдөр өглөө алагдсан мэдээг Малайзийн Цагдаагийн газраас баталлаа. Түүний үхлийн шалтгааныг албан ёсоор тогтоогоогүй ч Ким Чен Нам хорлогдсон нь тодорхой болжээ.
“Макао орохоор Куала-Лумпур хотын нисэх буудалд очсон Ким Чен Намын толгойг нэгэн эмэгтэй хортой даавуугаар бүтээсэн. Хор тэр дороо үйлчилж, Кимийн нүд сохрон, эмнэлэгт хүргэсэн боловч замдаа нас барсан байна” гэж Malaysiakini мэдээлсэн. Харин зарим хэвлэлд хоёр эмэгтэй Ким Чен Нам руу дайрч, хортой зүүгээр хатгасан гэж бичсэн байна. Алуурчид баригдаагүй зугтаж чаджээ.
Ким Чен Нам нь 1971 онд төрсөн. 2011 онд насан эцэслэсэн Их удирдагч Ким Чен Ирийн ууган хүү. 2001 онд Японд хуурамч паспортоор нэвтрэх гэж оролдоод баригдсанаас болж, нутагтаа ад үзэгдэж эхэлсэн юм. Түүнээс хойш эх орондоо харилгүй, байнга гадаадад амьдарч байв.