Цагаан сараар 9 хоног амрах уу?
Тахиа жил гарахад 12 хоног үлджээ.
Энэ жилийн хаврын тэргүүн сарын шинийн нэгэн энэ сарын 27-нд тохиож буй. “Муу нүүрт” хэмээх бичин жил шувтарч, XVII жарны “Алтан унжлагат" хэмээх улаагчин тахиа жил гарахад 12 хоног үлджээ.
Билгийн тооллоор бичин жилийн хамгийн сүүлчийн өдөр буюу битүүн энэ сарын 26-нд болно. Энэ өдөр ням гарагт тохиож байгаа.
Мөн шинийн 1-3-нд бүх нийтээр амрах бөгөөд эдгээр өдөр даваа, мягмар, лхагва гарагт таарч буй. Түүнчлэн бид шинийн 4, 5 буюу пүрэв, баасан гарагт амрах магадлал ч бий. Учир нь өнгөрсөн арванхоёрдугаар сарын 30 буюу баасан гарагийг Засгийн газрын хуралдаанаар ханиад, томуутай холбоотойгоор амралтын өдөр болгож, нөхөн ажиллах шийдвэр гаргасан. Энэ дагуу иргэд арванхоёрдугаар сарын 29, 30, 31 болон нэгдүгээр сарын 1 гээд дөрвөн өдөр амарсан билээ. Хэрвээ энэ удаа Засгийн газрын хуралдаанаар шинийн 4, 5-нд иргэдийг амраах шийдвэр гаргавал Цагаан сарын баяраар бид 9 хоног амрах нь.