65-аас дээш насныхан худал мэдээлэл шэйрлэх магадлал 7 дахин өндөр байна
Принстон болон Нью-Йоркын Их Сургуулийн судлаачид хамтран олон нийтийн сүлжээнд тархаж буй худал мэдээлэлтэй холбоотой нэгэн сонирхолтой судалгаа явуулжээ. Тэд 3500 орчим хүнийг хамруулж, 2016 оны АНУ-ын Ерөнхийлөгчийн сонгуулийн үеэр шэйрлэсэн мэдээлэлд нь анализ хийсэн байна.
Судалгааны үр дүн тэдний төсөөлж байснаас өөр байсан гэдгийг дээрх их сургуулийн эрдэмтэд онцлон хэлжээ. Учир нь олон нийтийн сүлжээнд худал, баталгаатай бус мэдээллийг шэйрлэхэд боловсрол, хүйс, улс төрийн үзэл баримтлалаас илүү тухайн хүний насны байдал нөлөөлж байгаа нь судлаачдын анхаарлыг татжээ.
Судалгаанаас үзэхэд фэйсбүүк ашигладаг 65-аас дээш насныхан хуурамч мэдээллийг шэйрлэх магадлал 30-аас доош насныхантай харьцуулахад 7 дахин өндөр байжээ. Тодруулбал, судалгаанд оролцсон 65-аас дээш насны хүмүүсийн 11 хувь нь хуурамч мэдээллийг тогтмол шэйрлэж байсан бол 18-29 насныхны ердөө 3 хувь нь л энэ төрлийн мэдээллийг олон нийтийн сүлжээнд хуваалцжээ.