Назарбаев: Чингис хааныг казах гэх нь надад таалагддаггүй
Бидэнд өөр ярих, хэлэх зүйл байхгүй юм шиг л.
“Казахстаны Ерөнхийлөгч Нурсултан Назарбаев Шинжлэх ухааны үндэсний академийн 70 жилийн ойн баярын хуралд оролцож, үг хэллээ. Ерөнхийлөгч Назарбаев хэлсэн үгэндээ сүүлийн үед нэлээд маргаан дагуулаад байгаа Чингис хаан казах хүн мөн үү гэсэн асуултын талаар үзэл бодлоо илэрхийлсэн” гэж Казахстаны “Информ Бюро” агентлаг мэдээллээ.
Нурсултан Назарбаев “Чингис хаан, хатан хаан Томирис нарыг казах хүн гэж хэлэх нь надад таалагддаггүй. Бидэнд өөр ярих, хэлэх зүйл байхгүй юм шиг л. Урагшаа харах цаг болсон. Нэг удаа Тони Блэр “Их Британи бол агуу түүхтэй орон. Гэхдээ бид музейд амьдраад байж болохгүй. Хүмүүсийг компьютерийн ард суулгах цаг ирсэн” гэж хэлж байсан юм. Бид ч мөн адил ингэх ёстой. Эрдэмтэд та нарын үг үнэ цэнэтэй. Одоо казахстанчуудын ирээдүй ямар байх вэ гэдэг асуудал илүү чухал. Ахмад үеийнхэн бид тусгаар тогтнолоо олж, өргөн уудам талд хүчирхэг гүрэн байгуулсан” гэж хэлсэн байна. Мөн хойч үеэ сүүлийн үеийн шинжлэх ухаан, технологийг эзэмшсэн, дэлхийн хаана ч ажиллах чадвартай, ухаантай, мэдлэгтэй болгон хүмүүжүүлэхийн тулд англи хэл маш чухал, англи хэл эзэмшиж байж л казах хүн дэлхийд өрсөлдөж чадна гэж Н.Назарбаев онцолсон байна.