2 мин

Албаныхан иргэдэд сэрэмжлүүлэг хүргэлээ

2016 онд улсын хэмжээнд бүртгэгдсэн 100 мянга гаруй осол, гэмтлийн 16 хувь нь зам тээврийн ослын улмаас үүссэн байна.

Э.Намуун 2017.02.23 42 42 24

Өнөөдөр Замын цагдаагийн алба, Нийслэлийн онцгой байдлын газар, Нийслэлийн түргэн тусламжийн төв болон Гэмтэл согог судлалын үндэсний төв хамтран Сар шинийн баяр болох гэж байгаатай холбогдуулан иргэдэд мэдээ мэдээлэл, сэрэмжлүүлэг хүргэлээ.

Энэ үеэр Замын цагдаагийн албаны Урьдчилан сэргийлэх, олон нийттэй харилцах хэлтсийн дарга, цагдаагийн хурандаа Э.Бөхбат хэлэхдээ “Баярын бэлтгэл ажил ихээхэн шаарддаг учраас өмнөх өдрүүдэд болон Битүүний өдөр томоохон зах худалдааны төвийн ачаалал эрс нэмэгддэг тул иргэд, жолооч нар аль болох хувийн тээврийн хэрэгслээс татгалзаж, нийтийн тээврийн хэрэгслийг сонгох, дор бүртээ хувийн зохион байгуулалт хийхийг зөвлөж байна. Мөн Цагдаагийн байгууллагын алба хаагчид баярын өдрүүдээр гарч болзошгүй зам тээврийн ослоос урьдчилан сэргийлэх, иргэдийг аюулгүй зорчуулах зорилгоор өндөржүүлсэн бэлэн байдалд бүрэн бүрэлдэхүүнээр болон ХСИС-ын сонсогчидтой хамтран ажиллана” гэв.

ГССҮТ-ийн эмч Г.Буян-Арвижих “2016 онд улсын хэмжээнд бүртгэгдсэн 100 мянга гаруй осол, гэмтлийн 16 хувь нь зам тээврийн ослын улмаас үүссэн байна. Өөрөөр хэлбэл жилд 17000 хүн зам тээврийн осолд өртөж, өдөрт 50 орчим хүн зам тээврийн ослын улмаас гэмтэж бэртэж байна. Мөн осол хэрэг болсоны дараа хүний эрүүл мэнд, сэтгэл зүй, эдийн засагт ихээр нөлөөлдөг бөгөөд эмчилгээнд багаар бодоход 400 мянга цаашлаад 5 сая, 10 саяаар үнэлэгдэх хагалгаатай холбоотой зардлууд гардаг. Хайртай дотны хүмүүсээ хажуудаа суулгачихаад хурд хэтрүүлдэг, согтуугаар тээврийн хэрэгсэл жолоодоно гэдэг бол амь нас, эрүүл мэндээ эрсдэлд оруулж байна гэсэн үг юм” гэлээ.

Мөн НОБГ-ын дэд дарга, хурандаа Д.Эрдэнэбаатар “Баярын өдрүүдээр иргэд ердийн галлагаатай пийшин зуухны аюулгүй байдлыг хангах, эвдрэл гэмтэлгүй, зориулалтын цахилгааны утас хэрэглэхийг зөвлөж байна. Мөн баяр, амралтын өдрүүдээр байгууллага, аж ахуй нэгжүүд амрах учраас хариуцлагатай жижүүрийг томилон ажиллуулах, дохиоллын системийн бүрэн бүтэн байдлыг хангах шаардлагатай байна” гэсэн юм.

НТТТ-ийн их эмч Л.Бямбацогт мэдээллэхдээ “Баярын өдрүүдээр яаралтай түргэн тусламжийн төвийн дуудлага нэмэгдэх хандлагатай байдаг. Үүнд голчлон архины болон хүнсний бүтээгдэхүүнээс авсан хордлогоны дуудлага мэдээлэл, мөн хоорондоо зодоон хийсний улмаас гэмтэж бэртсэн хүмүүсийн дуудлага ихээр ирдэг. Иймд иргэд хэрэглэж буй хүнсний бүтээгдэхүүний хугацаа, хадгалалтанд анхаарч, мөн түргэн муудах хүнсний бүтээгдэхүүнийг аль болохыг хэрэглэхгүй байх, архи, согтууруулах ундааны зүйлээс татгалзахыг зөвлөж байна” хэмээн ярилаа гэж Замын цагдаагийн албанаас мэдээллээ.

Э.Намуун 2017.02.23