Турк улсын буцалтгүй тусламжаар Улаанбаатар хотод 10 эмнэлэг барина
Өрхийн эрүүл мэндийн төвийн 600 ам метр талбайд барилга, 400 ам метр нь ногоон байгууламж бүхий орчны талбай байна.
Нийслэлийн Засаг даргын Нийгмийн асуудал хариуцсан орлогч Ш.Анхмаа Турк Улсын Истанбул хотын Хурлын төлөөлөгч, Захирагчийн ахлах зөвлөх Хакки Турунч тэргүүтэй зочдыг хүлээн авч уулзлаа. Турк улсын буцалтгүй тусламжаар Улаанбаатар хотод 10 эмнэлгийн барилга барих төслийн талаар ярилцав. Тодруулбал, манай улсын нийслэлд 9 өрхийн эрүүл мэндийн төв, 1 Диализын төв барихаар төлөвлөж байгаа юм.
Төслийг дөрөвдүгээр сарын эхээр эхлүүлэх төлөвлөгөөтэй байгаагаас гадна эмнэлгийн барилгын ажлыг монголын компаниудаар гүйцэтгүүлэхийг Истанбул хотын Захирагчийн ахлах зөвлөх Хакки Турунч хэллээ. Мөн Диализын төвийг 10 аппараттай байхаар төсөлд тусгажээ.
Өрхийн эрүүл мэндийн төв болон Диализын төвийн барилга барих газрыг нийслэлийн зүгээс бэлдсэн байна. Тодруулбал, Диализын төвд Хан-Уул дүүрэгт 5000 ам метр талбай, 9 өрхийн эрүүл мэндийн төв тус бүрт 1000 ам метр талбай захирамжилсан гэв. Өрхийн эрүүл мэндийн төвийн хувьд 600 ам метр талбайд төвийн барилга, 400 ам метр нь ногоон байгууламж бүхий орчны талбай байна гэж тооцсон байна.
Туркийн талын тооцоолсноор нэг өрхийн эрүүл мэндийн төв 6 эмчтэй. Эмч тус бүр 1800-2000 иргэн буюу нийт 12 мянган иргэнд үйлчлэх хүчин чадалтай гэж тооцоолжээ. Истанбул хотын төлөөлөгчид сонгогдсон газартай очиж танилцаад Улаанбаатар хотын удирдлагатай дахин ярилцахаа хэллээ.