мин

Магнолиан хамтлаг Монголоос анх удаа "SXSW 2017" фестивальд оролцоно

Дэлхийн амьд хөгжмийн нийслэлд тооцогддог АНУ-ын Техас мужийн Остин хотод болох “South By Southwest” фестиваль нь 1987 оноос хойш зохион байгуулагдаж буй.

2017.03.06

Энэ оны 3 сарын 10-19 хооронд дэлхийн амьд хөгжмийн нийслэлд тооцогддог АНУ-ын Техас мужийн Остин хотод зохион байгуулагдах “South By Southwest” фестивальд инди фолк урсгалаар уран бүтээлээ туурвидаг залуу Монгол хөгчимчин Магнолиан оролцохоор болжээ.

1987 оноос хойш тасралтгүй зохион байгуулагдаж буй "South By Southwest" (SXSW.com) фестивальд тухайн цаг үеийн дэлхийн хамгийн шинэлэг, шилдэг хөгжимчид, дуучид, хамтлагууд, кино найруулагч, зохиолч, продюсерүүд уригдан оролцож уран бүтээлээ оролцогчдын сонорт хүргэдэг билээ. Түүнчлэн дэлхийн шилдэг сэтгэгч, техник технологийн салбарын зохион бүтээгчид энэ үеэр шинэ ололт нээлтүүдээсээ танилцуулж, өдгөө дэлхийн дахинд болж буй нийгэм эдийн засгийн асуудлуудыг хөндсөн хэлэлцүүлэгүүд хийдэгээрээ алдартай. Тухайлбал өнгөрсөн жилийн интерактив салбарын хэлэлцүүлгийн нээлтийг АНУ ерөнхийлөгч асан Барак Обама нээж үг хэлсэн байдаг.

Бүтээлч салбаруудыг нэг дор нэгтгэсэн "SXSW" фестиваль уран бүтээлчдэд дэлхийд гарах боломжуудыг олгодогоороо онцлог юм.

Магнолиан нь Б. Дөлгөөний тайзны нэр. 2016 оны зун 6 дуутай “Famous Men” нэртэй богино хэмжээний цомгоо гаргаснаас хойш монголын хөгжмийн ертөнц, сонсогчдын дунд өөрийн гэсэн орон зайг бий болгож чадсан. Мөн түүний анхны цомгийг гадаад дотоодын нэр бүхий цахим хуудсууд өндрөөр үнэлжээ. Тодруулбал AНУ-ын нэр хүндтэй nerdist.com-д “7-р сарын Шилдэг Цомог”-оороо нэрлэсэн.