1 мин

Улсдаа үнэтэй хувь нэмэр оруулсан эмэгтэйчүүдэд хүндэтгэл үзүүллээ

НЗДТГ-аас санаачлан, ажиллаж буй салбартаа түүчээ болж буй есөн эмэгтэйд анх удаа хүндэтгэл үзүүлэв.

Э.Намуун 2017.03.09 27 11 3

Олон улсын эмэгтэйчүүдийн эрхийг хамгаалах өдрийг тохиолдуулан нийслэлд ажиллаж, амьдарч, улс орныхоо хөгжил дэвшилд үнэтэй хувь нэмэр оруулсан салбар салбарын тэргүүлэгч эмэгтэйчүүдэд нийслэлийн удирдлагууд болон НИТХ-ын төлөөлөгч эмэгтэйчүүд хүндэтгэл үзүүлж гарын бэлэг өглөө. Хүндэтгэл үзүүлэх ёслолын арга хэмжээнд нийслэлийн Засаг даргын орлогч дарга Ш.Анхмаа, НИТХ-ын төлөөлөгч С.Эрдэнэтуул, НИТХ-ын төлөөлөгч Д.Мөнхжаргал болон бусад албаны хүмүүс байв.

Нийслэлийн Засаг даргын орлогч Ш.Анхмаа болон НИТХ-ын төлөөлөгч эмэгтэйчүүд салбар салбарын тэргүүний ажилтнуудтай нийгэмд болон тэдний ажиллаж байгаа салбарт эмэгтэйчүүдийн өмнө тулгамдаж буй асуудлуудын талаар нээлттэйгээр ярилцсан юм. Хүндэтгэл үзүүлэх арга хэмжээнд төр захиргааны байгууллагад олон жил үр бүтээлтэй ажилласан И.Цэрэндулам, Хот тохижилтын газарт тасралтгүй 33 жил ажиллаж байгаа Д.Баянжаргал, боловсролын салбарын тэргүүний ажилтан З.Болормаа, өндөр настан Ц.Цэрэнлхам, Соёл урлагын салбарын төлөөлөл болгож СТА Ч.Дэлгэрцэцэг, Цагдаагийн байгууллагад тасралтгүй 30 жил ажилласан, цагдаагийн хурандаа Д.Цэцэгмаа, цусны хүндэт донор Т.Алимаа, спортын салбарын төлөөлөл МУГТ, олимпийн наадмын мөнгөн медальт Д.Сумъяа, эрүүл мэндийн салбарт 30 гаруй жил ажилласан хүний их эмч Д.Ганцэцэг нар хүрэлцэн ирсэн юм.

Нийслэлийн Засаг даргын орлогч Ш.Анхмаа “Олон улсын эмэгтэйчүүдийн эрхийг хамгаалах өдрийг тохиолдуулан НИТХ болон НЗДТГ-аас санаачлан, ажиллаж буй салбартаа түүчээ болж буй есөн эмэгтэйд анх удаа хүндэтгэл үзүүлэх арга хэмжээг зохион байгуулж байна. Салбар салбарын төлөөллүүдийг хүлээн авч хүндэтгэл үзүүлж байгаадаа баяртай байна. Энэ арга хэмжээг цаашид жил бүр уламжлал болгон зохион байгуулж байхаар болсон” гэлээ.

Э.Намуун 2017.03.09