1 мин

Казах “Витас” Хятадыг байлдан дагууллаа

Витасын хуулийн зөвлөх Димашт “Опера 2” дууг дахин дуулахыг хориглосон албан бичиг ирүүлжээ.

М.Сугар-Эрдэнэ 2017.03.14

Хятадын “I Am a Singer 2017” дууны уралдаанд оролцож байгаа Казахстаны дуучин Димаш Кудайбергенов тэрбум гаруй хүнтэй тус орныг бүрэн эрхшээлдээ оруулжээ. Түүний цэвэр тунгалаг хоолой урд хөршийн үзэгчдийн бишрэлийг төрүүлж байна. Хоолой сайнаас гадна шаггүй царайлаг залуу тул хятад охид бүсгүйчүүд түүнийг харахын тулд зочид буудлынх нь гадаа хонодог болсон гэнэ.

“I Am a Singer 2017” уралдаан мэргэжлийн дуучид оролцдог тэмцээн. Нийт 10 шаттай явагддаг. Эхний 9 шатын дараа гурван шилдэг оролцогч үлдсэн бөгөөд тэдний дунд мэдээж Димаш байна.
Димашийн үзэгчдийг татсан хамгийн шилдэг үзүүлбэр ОХУ-ын дуучин Витасын “Опера 2” дуу байлаа.

Хоолой шаардсан энэхүү дууг казах залуу маш сайн дуулсан тул цахим ертөнцөөр “Витас Димаш хоёрын хэн нь илүү вэ” гэсэн асуулга хүртэл явагдсан юм. Удалгүй Витасын хуулийн зөвлөх Димашт “Опера 2” дууг дахин дуулахыг хориглосон албан бичиг ирүүлснээр эсрэгээрээ Димаш улам алдартай болсон юм. “Singer 2017” уралдааны хүндэт зочин Жеки Чан түүнтэй уулзахыг хүсч, Өмнөд Солонгосын К-ПОП-ынхон ч түүнийг Азийн од гэдгийг хүлээн зөвшөөрөөд байна.

Димаш Кудайбергенов 22 настай. Казахстаны Актобе хотын уугуул.