Хакүхо Хаврын тэмцээнээс гарлаа
Такаясүтэй барилдаж байхдаа баруун хөлөө гэмтээсэн.
Японы Осака хотноо болж буй сүмо бөхийн Хаврын тэмцээний тав дахь өдрөөс их аварга Хакүхо барилдахгүй боллоо. Хаврын тэмцээн түүний хувьд тун тааруухан эхэлсэн. Эхний өдөр Шёодайд унаж, дараа нь хоёр ялсан ч өчигдөр маэгашира Икиойд өвдөг шороодсон. Ояката, шинжээчид ч их аваргад юу тохиолдов хэмээн гайхаж байсан юм. Миягино ояката “Башё эхлэхээс өмнө 8-ний өдөр Кисэносатогийн дэвжээнд очиж, бэлтгэл хийсэн. Такаясүтэй барилдаж байхдаа баруун хөлөө гэмтээсэн. Тачиай хийхэд ч хэцүү болсон байснаа өчигдөр улам сэдрээчихлээ. Өнөө өглөө эмнэлэгт үзүүлээд тэмцээнээс гарахаар шийдсэн” гэж сэтгүүлчдэд мэдээлсэн байна. Өнөөдөр түүнтэй барилдах байсан Митакэүми ийнхүү азтай нэг ялалт авлаа. Сүмогийн холбооноос маргааш өдрийн оноолтыг хийчихсэн байсан ч өнөөдрөөс Хакүхо барилдахгүй болсон тул дахин гаргахаар болжээ.