Чөлөөт бөх: ОХУ-Дэлхийн шигшээгийн халз барилдаан хойшиллоо
АНУ-ын шигшээ багийнхан улсын аваргын тэмцээндээ ид бэлтгэж байгаа болохоор одоо халз барилдаан зохион байгуулах тохиромжтой цаг биш гэж үзсэн.
Энэ сарын 24-нд Владикавказ хотод ОХУ-ын чөлөөт бөхийн шигшээ баг Дэлхийн шигшээтэй халз үзэлцэх болсон талаар бид мэдээлсэн билээ. Ялсан бөх 10 мянга, ялагдсан нь 3000 ам.долларын шагналтай тус барилдаанд Дэлхийн шигшээ багт олимпийн аварга АНУ-ын Жордан Барроуз, Риогийн медальт Италийн Франк Чамизо нар барилдахаар болсон байсан.
Гэвч тэмцээн хойшилж, тавдугаар сард явагдахаар болжээ. ОХУ-ын чөлөөт бөхийн шигшээ багийн ахлах дасгалжуулагч Замболат Тедеев "Дэлхийн шигшээ багтай хийх бидний тулаан явагдана, гэхдээ хугацаа нь бага зэрэг хойшилсон. АНУ-ын шигшээ багийнхан улсын аваргын тэмцээндээ ид бэлтгэж байгаа болохоор Жордан Барроуз, Кайл Снайдер нар Владикавказад тулаанд оролцох нь бэлтгэлд нь сөргөөр нөлөөлнө гээд байгаа. Тийм болохоор бид одоо халз барилдаан зохион байгуулах тохиромжтой цаг биш гэж үзсэн. Европын аврага шалгаруулах тэмцээний дараа тавдугаар сарын дундуур зохион байгуулахаар бэлтгэж байна. ОХУ-ын шигшээ багт жин бүрийнхээ шилдгүүдийг сойх бол Дэлхийн шигшээд сүүлийн олимпийн наадам, ДАШТ, Европын АШТ-д сайн барилдсан оддыг сонгоно” гэж сэтгүүлчдэд мэдээллээ.
1994 он
ОХУ – Дэлхийн шигшээ – 8:2
Хойд Осет – Дэлхийн шигшээ – 6:4
1995 он
ОХУ – Дэлхийн шигшээ – 7:3
Хойд Осет – Дэлхийн шигшээ – 4:6