1 мин

Л.Наранбаатар: Монголын жижиг нүүрсний ордууд “моодонд” орлоо

Гэхдээ их хэмжээний хөрөнгө оруулалт уурхайдаа хийж болохгүй шүү гэж анхаарууллаа.

Э.Хулан 2017.03.23 42 37 10

Эрдэс баялагийн эдийн засагч Л.Наранбаатар фэйсбүүкийн “Геологи, уул уурхайн салбарынхан нэгдэцгээе” группт Монголын төмөр зам дагуу оршдог жижиг нүүрсний ордууд моодонд орлоо гэж бичжээ. 

БНХАУ Хойд Солонгост хориг тавьснаас шалтгаалж ийнхүү Монголын нүүрс моодонд орж буйг онцлоод, хориг энэ оны эцэс хүртэл үргэлжлэх учраас уурхайдаа их хэмжээний хөрөнгө оруулалт хийж болохгүй, сайтар ажиглах хэрэгтэй гэж анхааруулжээ. Түүний зөвлөгөөг хүргэж байна. 

Хятад Хойд Солонгосоос нүүрс авахаа зогсоосон нь манай төмөр зам дагуу оршдог жижиг нүүрсний ордуудыг "моодонд" орууллаа.

Хятадын антрацитын нийлүүлэлт энэ жил 20 орчим сая тонноор тасалдаж буй учир Монголоос гадна Австрали, ОХУ, Индонезоос нүүрс авч байна. 

Хятадын хориг 2017 оныг дуустал үргэлжилэх тул энэ жилдээ үнэ тогтвортой байх хандлагатай байна. Өнөөдрийн байдлаар антрацит нүүрсний үнэ Хятадад таван хувиар өсжээ. Сүүлийн сар өсөлт нь тогтворжоод байсан юм.

Өнөөдөр Олон овоот өртөөнөөс Тяньжин боомт уруу нүүрс шууд тээвэрлэгдэх гэж байна. Тээвэрлэлтийн хурд, өртөг, өрсөлдөх чадвараа тандах туршилт амжилттай болбол нүүрсний салбарт бас нэгэн боломж авчирна.

Гэхдээ уурхай эзэмшигчид тайвширч болохгүй, энэ бол урт хугацааны биш богино хугацааны тенденц! Тиймээс уурхайдаа том хөрөнгө оруулалт хийгээд балрав! Аль болох мэргэжлийн гэрээт олборлогчоор уулын ажлаа гүйцэтгүүлж, эрсдэлээ удирдахыг зөвлөж байна. Зах зээлийн чиг хандлагаа дахиад 7 сар хүртэл ажигла!

Э.Хулан 2017.03.23