2 мин

Монголын улс төрд гацсан топ 5 сэдэв

Б.Энхцэцэг 2017.03.28 36 36 31

40

1.    Ерөнхийлөгчийн сонгууль-2017. Гуравхан сарын дараа Монгол Улсын Ерөнхийлөгчийн сонгуулийн санал хураалт болох ч юм шиг, үгүй ч юм шиг. С.Жавхлан, С.Ганбаатар зэрэг сайн дурын нэр дэвшигчид гарч ирснийг бодоход сонгууль болох юм шиг. Харин УИХ-д суудалтай АН, МАН дотор Ерөнхийлөгчийн сонгууль чиглэсэн ямар нэг уур амьсгал ороогүй байгаагаас үзвэл тэд энэ удаа өнжих гээд байгаа ч юм шиг, Ц.Элбэгдорж бүрэн эрхээ сунгах гээд байгаа ч юм шиг.

2.    Ардчилсан намын шинэчлэл. АН шинэчлэгдээд С.Эрдэнэ гэдэг шинэ даргатай болсон ч юм шиг. Гэтэл шинэчлэлийн амин сүнс болсон шинэ дүрмийг нь Дээд шүүх бүртгэж аваагүйг бодоход АН одоо болтол шинэчлэгдээгүйгээр үл барам нам болж түвхнэж чадахгүй байгаа ч юм шиг.

3.    ОУВС-гийн зээл. Монгол Улсын Засгийн газар ОУВС-гаас зээл авах ч юм шиг, үгүй ч юм шиг. Зээл авахаар тохирох гэж байна, тохирч байна, тохирлоо гэсэн хүлээлтийг анх үүссэн цагаас нь хойш тоолбол хагас жилийн нүүр үзлээ. Энэ нь “ОУВС-гийн зээл” гэсэн сэдэв мэргэжлийн Засгийн газартай чацуу гэсэн үг. Сангийн сайд Б.Чойжилсүрэн доллар хомсдоно гэж анхааруулсаар байгааг бодоход ОУВС-гаас юу ч харах хэрэггүй болсон ч юм шиг.

4.    С.Зоригийн хэргийн захиалагч. С.Зоригийн амь насыг бүрэлгэхийг хэн нэгэн даалгаж, захиалсан ч юм шиг, үгүй ч юм шиг. “Захиалгатай” гэж шүүх дүгнэснийг бодоход үнэн мөнийг олсон юм шиг мөртлөө, захиалагчийг нэрлэхгүй, яллахгүй байгаагаас нь үзвэл захиалгагүй мэт. Энэ хэрэгт одоо ч улс төрийн нөлөө байгаа юм шиг.

5.    “Эрдэнэт үйлдвэр”. Оросууд хувь эзэмшлээ Монголын талд шилжүүлснээр ГОК 100 хувь Монголынх болсон ч юм шиг, үгүй ч юм шиг. Түүнийг худалдаж авсан “Монгол зэс” компани хууль зөрчсөнийг УИХ, Засгийн газрын шийдвэрүүд нотолсноор “Эрдэнэт үйлдвэр”-ийн хувь эзэмшил ойлгомжгүй байдалд гацав.  

Б.Энхцэцэг 2017.03.28

40