Туул голын ойролцоох мод, бургасыг зөвшөөрлийн дагуу шилжүүлж байна
“Яармагийн шинэ гүүр барих, хуучин гүүрийг засварлах” төслийг хэрэгжүүлж байна.
БНХАУ-ын Засгийн газрын хөнгөлөлттэй зээлийн хөрөнгөөр нийслэлийн Хан-Уул дүүргийн 4 дүгээр хорооны нутаг дэвсгэрт хэрэгжиж буй “Яармагийн шинэ гүүр барих, хуучин гүүрийг засварлах” төслийн хүрээнд зам гүүрийн ажлын бэлтгэл болох технологийн дагуу тухайн орчны мод, бургасыг чөлөөлөх газар шорооны ажил хийж байна.
Уг төсөл нь холбогдох хууль, тогтоомжийн дагуу батлагдсан ерөнхий үнэлгээ, байгаль орчны менежментийн төлөвлөгөөтэйгөөр үйл ажиллагаа явуулж байгаа тул хууль бусаар мод, бургасыг тайрч байна гэсэн мэдээлэл ташаа аж. Чөлөөлсөн мод бургасыг Богд уул руу шилжүүлэн, суулгажээ.
Энэ асуудлаар гүйцэтгэгч аж ахуйн нэгжид шаардлага тавьж, бүтээн байгуулалтын ажлын мэдээлэл бүхий самбарыг байрлуулж, иргэдийг төөрөгдүүлэхгүй байх шаардлагыг харьяа албаны газраас тавьжээ. Нийслэлийн нутаг дэвсгэр, ногоон бүсэд үйлдэгдэж буй байгаль орчны эсрэг аливаа хэрэг, зөрчлийн мэдээ, мэдээллийг нийслэлийн Байгаль орчны газрын 323780 дугаарын утсанд мэдэгдэх боломжтой.