Дорнод аймагт ноолуур 100 мянган төгрөгт хүрчээ
Харин Говь-Алтай, Баян-Өлгий, Завхан, Ховд, Өмнөговь аймагт цагаан ноолуурыг 64 - 65 мянган төгрөгөөр зарж байна
Хөдөө аж ахуйн гол нэр төрлийн бүтээгдэхүүн болох цагаан ноолуурын үнэ Дорнод аймагт хамгийн өндөр үнээр зарагдаж байна. Тус аймагт нэг килограмм ямааны ноолуурыг 100 мянган төгрөгөөр зарж байгаа юм. Харьцуулахад, Говь-Алтай, Баян-Өлгий, Завхан, Ховд, Өмнөговь аймагт цагаан ноолуурыг 64 - 65 мянган төгрөгөөр зарж байгаа гэнэ.
Үндэсний статистикийн хорооны энэ оны гуравдугаар сарын үнийн мэдээллээс үзэхэд, үхрийн хоёр метрээс дээш урттай ширний дундаж үнэ Сүхбаатар, Говь-Алтай, Өвөрхангай, Хөвсгөл аймагт хамгийн бага буюу 15 - 20 мянга, Сэлэнгэ аймаг болон Улаанбаатар хотод хамгийн их буюу 35 - 39.5 мянган төгрөгт хүрчээ.
Харин адууны ширний дундаж үнэ Говь-Алтай, Сүхбаатар, Булган аймагт хамгийн бага буюу 15 - 17.5 мянган төгрөг, Дундговь, Өмнөговь аймаг, Улаанбаатар хотод хамгийн их буюу 31 - 33 мянгад хүрсэн байна.