Өнгөрсөн сард монгол төгрөг ам.доллар, юанийн эсрэг чангарлаа
Үндэсний статистикийн хорооны танилцуулсан энэ оны гуравдугаар сарын нийгэм, эдийн засгийн үзүүлэлтээс харахад монгол төгрөг ам.доллар, юанийн эсрэг чангарлаа. Харин ОХУ-ын рубльтэй харьцах ханш өмнөх сартай харьцуулахад суларсан байна.
Төгрөгийн америк доллартай харьцах Монголбанкны нэрлэсэн дундаж ханш энэ оны гуравдугаар сард 2459.55 төгрөг болж, өмнөх оны мөн үеэс 413.21 (20.2 хувь) төгрөгөөр суларчээ. Харин өмнөх сараас 0.8 хувиар чангарсан байна.
Төгрөгийн юаньтай харьцах Монголбанкны нэрлэсэн дундаж ханш гуравдугаар сард 356.57 төгрөг болж, өмнөх оны мөн үеэс 42.1 (13.4 хувь) төгрөгөөр суларч, өмнөх сараас 1.1 хувиар чангарсан байна.
Төгрөгийн рубльтэй харьцах Монголбанкны нэрлэсэн дундаж ханш гуравдугаар сард 42.51 төгрөг болж, өмнөх оны мөн үеэс 13.33 (45.7 хувь) төгрөг, өмнөх сараас 0.2 хувиар суларсан байна.