“Бумбардай” Зүүн Өмнөд Азийг эзэлнэ
Энэ удаагийн ажиллагаагаа бид “Бумбурдайн аялал. Зүүн Өмнөд Ази” хэмээн нэрлэж байгаа.
“Монголын зураач Н.Эрдэнэбаярын сая хүнийг уйлуулсан зохиол “Бумбардай” Зүүн Өмнөд Азийг эзлэхээр мордлоо” гэж Японы “JIJI” агентлагаас мэдээллээ. Манай манга зураач Н.Эрдэнэбаяр Японы “Wedge Holdings” компанитай хамтран ажиллах гэрээг энэ сард байгуулсан билээ. “Wedge Holdings” компаниас тус агентлагт илгээсэн мэдээг танилцуулья.
“Монголын зураач Н.Эрдэнэбаяртай байгуулсан гэрээ ёсоор менежментийн ажлаа эхэллээ. Хамгийн түрүүнд бид Вьетнам улсыг сонгосон. Вьетнамд болж байгаа “Illustrator contest Asia” зургийн уралдаанд Н.Эрдэнэбаяр шүүгчээр ажиллана. Мөн Ханой хотын “Movenpick” зочид буудалд “Бумбардай”-г танилцуулах үйл ажиллагаа зохион байгуулна. Энэ удаагийн ажиллагаагаа бид “Бумбурдайн аялал. Зүүн Өмнөд Ази” хэмээн нэрлэж байгаа. Н.Эрдэнбаяр энэ бүс нутгийн бүх орноор аялаж, бид аяллын дүрсийг Азийн орнуудад цацах юм. “Бумбурдай”-г Зүүн Өмнөд Азид танилцуулахаас гадна ирэх жил энд болох Н.Эрдэнбаярын уран бүтээлийн үдэшлэгийн сурталчилгааг хийх, шинэ мангагийн санаа олох гэсэн давхар зорилгуудтай аялал болж байна. Одоо Тайландад болж байгаа “Thailand Comic Con 2017”, ирэх сард Индонезид болох уралдаан, үзэсгэлэнд түүнийг оролцуулна” гэж мэдээлжээ.