Баянгол дүүргийн 17 дугаар хорооны хүүхдүүд цэцэрлэгтэй боллоо
242 дугаар цэцэрлэг өчигдөр үүд хаалгаа нээлээ.
Баянгол дүүргийн 17 дугаар хорооны 242 дугаар цэцэрлэг өчигдөр нээлтээ хийлээ. 120 хүүхдийн хүчин чадал бүхий тус цэцэрлэгийн байрны бүтээн босголтыг 1.3 тэрбум төгрөгийн нийслэлийн хөрөнгө оруулалтаар “Наранбулаг” ХХК хийж гүйцэтгэсэн байна.
Тус цэцэрлэгийн нээлтийн ажиллагаанд нийслэлийн Нийгмийн асуудал хариуцсан төслүүдийн удирдагч, Нийслэлийн Засаг даргын орлогч Ш.Анхмаа, НИТХ-ын нийгмийн хөгжлийн хорооны дарга Д.Мөнхжаргал, дүүргийн Засаг даргын орлогч Г.Нарангэрэл, нийслэлийн Боловсролын газрын санхүү, хөрөнгө оруулалт төлөвлөлтийн хэлтсийн дарга Ж.Энхтөр, дүүргийн Боловсролын хэлтсийн дарга Ц.Шижиртуяа болон дүүргийн төр захиргааны байгууллагын ажилтнууд, иргэд, эцэг эхийн төлөөлөл оролцлоо.
Нийслэлийн хэмжээнд 26 хороо цэцэрлэггүй байгаа бөгөөд эдгээрээс 17 дугаар хороо цэцэрлэгтэй болж байна.
Цэцэрлэгийн үйл ажиллагаа нээгдсэнээр тус хорооны хамран сургах тойргийн сургуулийн өмнөх насны 127 хүүхдийг хамруулан, хичээл сургалтын үйл ажиллагаагаа явуулж эхэллээ.
Тус цэцэрлэгийн эрхлэгч Н.Долгормаа “Манай хамт олон өнөөгийн хийгдэж буй боловсролын чанарын шинэчлэлийн суурь үзэл баримтлал болсон “Хүүхэд нэг бүрийг хөгжүүлэх” бодлогыг чанартай хэрэгжүүлэхийн тулд итгэл зүтгэл, сэтгэлээрээ нэгдэн ажиллах болно” гэж онцлов.