БХЯ-ны сайд Б.Бат-Эрдэнэ ОХУ-аас зэвсэг авна
Ялангуяа дахин байгуулагдсан Агаараас хамгаалах цэргийг бэхжүүлэхэд ОХУ-ын тусламж хэрэгтэй байна
Москвагийн Олон улсын аюулгүй байдлын VI бага хуралд оролцохоор хойд хөршид очоод байгаа БХЯ-ны сайд Б.Бат-Эрдэнийг ОХУ-ын БХЯ-ны сайд Сергей Шойгу өчигдөр хүлээн авч уулзлаа.
Сергей Шойгу юуны өмнө Тавантолгой дахь Зэвсэгт хүчний сургалтын нэгдсэн төвд хоёр цэргийн алба хаагч амь үрэгдсэнд харамсал илэрхийлээд Монгол Улсыг ШХАБ-д бүрэн эрхт гишүүнээр элсэнэ гэдэгт итгэж байгаагаа ярьсан байна. БХЯ-ны сайд Б.Бат-Эрдэнэ “Манай Засгийн газар ОХУ-тай харилцаандаа чухал ач холбогдол өгдөг. ЗХУ-ын үед бид холбоотон байсан бол одоо стратегийн түншүүд болсон” гэж уулзалтын үеэр онцлон тэмдэглэжээ.
Манай сайд мөн ОХУ-ын ТАСС агентлагт ярилцлага өгсөн байна. Б.Бат-Эрдэнэ ОХУ-ын БХЯ-ны сайд С.Шойгутэй хийсэн уулзалтаа амжилттай болсон гэж дүгнэж байгаагаа хэлээд “Бид ОХУ-д манай Зэвсэгт хүчний зэвсэглэлийг шинэчлэх, хүчирхэгжүүлэх тал дээр тусламж үзүүлээч гэсэн хүсэлт тавьсан. Ялангуяа дахин байгуулагдсан Агаараас хамгаалах цэргийг бэхжүүлэхэд ОХУ-ын тусламж хэрэгтэй байна” гэж хэлжээ.