Шар өвс шатаасны улмаас 12 айлын хашааны газар, 2 байшин галд өртлөө
Нийслэлийн Онцгой байдлын газарт өчигдөр 14:44 цагт дуудлага ирсэн байна.
Чингэлтэй дүүргийн 19 дүгээр хороо Жигжидийн зусланд гал гарч байна гэсэн дуудлага нийслэлийн Онцгой байдлын газарт өчигдөр 14:44 цагт ирсэн байна. Дуудлагын дагуу Сүхбаатар дүүргийн Онцгой байдлын хэлтсийн Гал түймэр унтраах аврах 34-р ангийн бүрэлдэхүүнийг очиход байшин, айлуудын хашааны шар өвс шатсан байдалтай байжээ.
Нэмэлт дуудлагаар гал түймэр унтраах аврах 10–р ангийн бүрэлдэхүүн ажиллаж, гал түймрийн тархалтыг зогсоосон байна. Хашааны шар өвсөө шатааж гал алдсаны улмаас 12 айлын хашааны газар, 2 айлын байшин шатжээ.
Нийслэлийн Онцгой байдлын газраас гал түймэрээс урьдчилан сэргийлэх чиглэлээр дүүргүүдийн ногоон бүсийн аж ахуй нэгж байгууллага, иргэдэд сэрэмжлүүлэх арга хэмжээг хэрэгжүүлж байгаа хэдий ч хаврын хуурайшилтын үед зуслангийн чиглэлд энэ төрлийн дуудлага буурахгүй байна. Эдгээр нь иргэдийн буруутай үйлдлээс болж байгаа тухай албаныхан хэлж байна.