Цэцэрлэгийн багш нар ур чадвараараа өрсөлдөж байна
Нийслэлийн 50 дугаар цэцэрлэгийн багш нар 2015 онд ярилцаж байгаад ур чадварын уралдаан зохион байгуулах, үр дүнд нь хаана, хэнд илүү сайн туршлага байна, түүнээсээ харилцан суралцах санаачилга гаргажээ. Тэдний санааг Баянзүрх дүүргийн Боловсролын газар дэмжсэнээр “Чадварлаг багш” ур чадварын уралдаан энэ жил гурав дахь удаагаа зохион байгуулагдаж байна. Бүр олон улсын чанартай болжээ.
Тус уралдаанд нийслэлийн Баянзүрх дүүргийн 50, 59, 20, 172, 61, 82, 129 дүгээр цэцэрлэгийн багш нараас гадна ӨМӨЗО-ы Шулуун хөх хошууны “Өэлүн” цэцэрлэгийн 6 багш оролцож байна. “Чадварлаг багш-2017” уралдаан Баянзүрх дүүргийн тэргүүний 32 дугаар цэцэрлэг дээр өглөө эхэлсэн бөгөөд багш нар хөдөлгөөн эрүүл мэнд, дүрслэх урлаг, математик гэсэн сэдвүүдээр нээлттэй хичээл явуулж, ур чадвараа сорьж, тун удахгүй дүн нь гарах юм.