ШУТИС-ийн оюутнуудын санаачилсан брайль үсгэн тайлбартай сүү олны анхаарлыг татаж байна
"Манай улсад харааны бэрхшээлтэй маш олон хүн байдаг. Гэвч тэдэнд зориулсан брайл үсгэн танилцуулгатай хүнсийн бүтээгдэхүүн байдаггүй"
Та өөрийгөө хараагүй хүн гээд төсөөлөөд үз дээ. Хүнсээ цуглуулахаар дэлгүүрт орохдоо та яаж юу авахаа сонгох вэ? Ямар ч боломжгүй мэт санагдаж байгаа биз. Тэгвэл харааны бэрхшээлтэй хүмүүс өдөр бүр ийм бэрхшээлтэй тулгардаг. Энэ асуудлыг бага ч гэсэн шийдвэрлэх зорилгоор хэсэг оюутнууд хамтран харааны бэрхшээлтэй хүмүүст зориулан хүнсний бүтээгдэхүүний савлагааг өөрчилж үзсэн байна.
ШУТИС-ийн ҮТС-ийн Хүнсний чанар, аюулгүй байдал, мэргэжлийн гуравдугаар курсийн оюутнууд энэ ажлын хүрээнд Сүү ХК-ийн Миний Монголын Сүүний савлагааг брайл үсгэн тайлбартай болгож өөрчилсөн байна. Тэд “Манай улсад харааны бэрхшээлтэй маш олон хүн байдаг. Гэвч тэдэнд зориулсан брайл үсгэн танилцуулгатай хүнсийн бүтээгдэхүүн байдаггүй. Тиймээс хараагүй хүмүүс хүнсээ өөрсдөө авах боломжгүй, үргэлж хэн нэгнээс туслалцаа авах хэрэг гардаг” хэмээн бичжээ.