Б.Дамба “Хаврын баяр”-т үзүүрлэж, “Ганрюүжима”-д ялагдлаа
Б.Дамба сүүлийн хэдэн жил “Ганрюүжима”-д дүү Хошиказэгийн хамт тулалдаж байгаа.
Японы тулааны урлагийн “Ганрюүжима” холбооны “Way of The Samurai” тэмцээн энэ сарын 6-нд болж, Төв аймгийн арслан Б.Дамба оролцлоо. Түүний өрсөлдөгч нь Японы жюүжицүгийн тамирчин Сэкинэ Шрек байв. Сэкинэ тус холбооны тэмцээнд анх удаагаа оролцож байгаа бол Б.Дамба сүүлийн хэдэн жил “Ганрюүжима”-д дүү Хошиказэгийн хамт тулалдаж байгаа.
Тулаан эхлээд хэд хэдэн удаа хөлд орох гэж оролдоод амжилт олоогүй Сэкинэ эхний үеийн дундуур Б.Дамбыг унагааж чадлаа. Хэвтээ байдалд 30 секунд л зарцуулах тусгай дүрэмтэй тоглолт байсан ч Сэкинэ 30 секундээ тун үр бүтээлтэй ашигласан. Б.Дамбыг өндийн босоход нь дахин хавирч унагаад, дээр нь гарч нүдэн, шүүгч тоглолтыг зогсоолоо.
Б.Дамба тэмцээний өмнөх өдөр Японы дахь монголчуудын “Хаврын баяр”-ын үндэсний бөхийн тэмцээнд зодоглож, Төв аймгийн Баян сумын харьяат, сумын харцага Г.Амгалантай үзүүр түрүү булаалдан унаж, үзүүрлээд байсан билээ.