3 мин

“Екатеринбург Их Дуулга”-д манай 20 жүдоч зодоглоно

2014 онд нийслэл Москва хот Их Дуулгын эрхээ Тюменьд шилжүүлж, гурван жилийн дараа Тюмень хот Екатеринбургт шилжүүлж байгаа нь энэ юм.

М.Сугар-Эрдэнэ 2017.05.10

Энэ сарын 20-21-нд ОХУ-ын Екатеринбург хот анх удаагаа жүдо бөхийн “Их Дуулга” тэмцээнийг хүлээн авах гэж байна. Одоогийн байдлаар 39 орны 328 жүдоч тус тэмцээнд оролцохоор мэдүүлгээ илгээжээ. Нутгийн эзэн ОХУ жин тус бүрт 4 бөх барилдуулах тул өрсөлдөөн ихтэй, сонирхолтой тэмцээн болох болно.
Олон улсын жүдо бөхийн холбооноос Парис, Баку, Екатеринбург, Абу-Даби, Токиод нийт таван “Их Дуулга” тэмцээн зохион байгуулдаг. Их Дуулгад түрүүлсэн жүдоч чансааны 1000 оноо авдаг бол мөнгөн медальт 700, хүрэл медальт 500 оноо авдаг билээ. Манай улсаас эрэгтэй 10, эмэгтэй 10 нийт 20 бөх “Екатеринбургийн Их Дуулга”-д зодоглоно.
Эрэгтэй:
60 кг: Г.Болдбаатар, Д.Амартүвшин
66 кг: Д.Төмөрхүлэг, Д.Алтансүх
73 кг: Ё.Басхүү, Б.Пүрэвдаваа
81 кг: Б.Алтансүх, Б.Гаажадамба
90 кг: Д.Цэрэнням
+100 кг: Б.Тэмүүлэн
Эмэгтэй:
48 кг: Б.Хорлоо, Э.Уртнасан
52 кг: А.Цолмон, Г.Ганцэцэг
57 кг: Л.Энхрийлэн, Б.Алтанцэцэг
63 кг: Ц.Цэрэннадмид, Б.Баасанжаргал
70 кг: М.Даваасүрэн, Б.Хонгорзул
Манай хойд хөршид жүдо бөхийн олон улсын тэмцээн эртнээс явагдаж ирсэн уламжлалтай. 1996-2000 онд Москвагийн олон улсын тэмцээн зохиогдож байсан бөгөөд жил ирэх тусам зэрэглэлээ дээшлүүлж, “Grand Prix Moscow”, “Super A-Tournament Moscow”, “Super World Cup Moscow” болгон нэрээ өөрчилсөөр 2009 он хүргэсэн билээ. 2009 онд “Москвагийн Их Дуулга тэмцээн” болон өргөжиж, тив тивийн шилдгүүдийн өрсөлдөөний талбар болон хувирсан. 2014 онд нийслэл Москва хот Их Дуулгын эрхээ Тюменьд шилжүүлж, гурван жилийн дараа Тюмень хот Екатеринбургт шилжүүлж байгаа нь энэ юм.
“Екатеринбургийн Их Дуулга” хоёр өдөр үргэлжилнэ. Бямба гарагт эрэгтэй 60, 66, 73 кг, эмэгтэй 48, 52, 57, 63 кг-д, Ням гарагт эрэгтэй 81, 90, 100, + 100 кг, эмэгтэй 70, 78, + 78 кг-д аваргууд тодорно. Урьдчилсан барилдаан орон нутгийн цагаар 10.00-д, финалын барилдаан 17.00-д эхлэнэ.
Манай жүдочдоос Москвагийн олон улсын тэмцээнээс анхны медалийг 2003 онд “Super A-Tournament Moscow” нэртэй байхад нь 60 кг-д Цагаанбаатарын Тэнгис, 57 кг-д Х.Эрдэнэт-Од нар хүртэж байлаа. Манай хоёр тамирчин хүрэл медаль авч байжээ.

Таван жилийн дараа “Супер Дэлхийн Цом” нэртэй болсон байхад нь Х.Эрдэнэт-Од 57 кг-д түрүүлсэн нь тус тэмцээнээс манайхны авсан анхны алтан медаль байлаа. Энэ жил манай жүдочид алтаас гадна 5 хүрэл медаль хүртсэн.
Алт: 57 кг Х.Эрдэнэт-Од
Хүрэл: Г.Болдбаатар 60 кг, Х.Цагаанбаатар 66 кг, М.Бундмаа 52 кг, Б.Түмэн-Од 63 кг, П.Лхамдэгд 78 кг.

“Grand Prix Moscow” 2009