5 мин

“Улаанбаатар марафон”-д гүйх хүмүүст зориулсан ПРАКТИК ЗӨВЛӨГӨӨ

Туршлагатай гүйгчид зөвлөж байна.

2017.05.17

“Улаанбаатар-Марафон” олон улсын арга хэмжээ энэ сарын 20-нд буюу ирэх бямба гаригт болох гэж байна. Жуулчдад ээлтэй орчин бүрдүүлэх, бүх нийтийг амьдралын эрүүл хэвшилд уриалах зорилготой тус марафон тамирчид болон сонирхогчдын ангилалд 42 км 195 метр, 21 км 095 метр, 10 км, 5 км, 1500 метрийн зайд зохион байгуулагдах юм.

Байнгын хөдөлгөөн, дасгал сургуулилт хийдэггүй хүнд бол гэнэт урт зайнд гүйнэ гэдэг хүнд даваа. Тэр дундаа 10-аас дээш км-ийн зайнд гүйх гэж буй хүмүүс эртнээс бэлтгэл сургуулилтаа хангасан байх ёстой аж. UB.LIFE өнгөрсөн жил “Улаанбаатар марафон”-д гүйх гэж буй хүмүүст зориулж туршлагатай гүйгчдийн практик зөвлөгөөнүүдийг хүргэж байсан. Тэр бүгдийг эргэн нэг харцгаая.

С.Энхтөр

2013, 2014, 2015 онуудад “Улаанбаатар марафон”-д 21 км-ийн зайд гүйсэн

Марафонд гүйхийн өглөө хөнгөн юм идэх хэрэгтэй. Хэт их идсэн, аль эсвэл өлөн ходоодтой гүйж болохгүй.
Пүүз тань хөлд эвтэйхэн байх ёстой.
Гараанаас гарахдаа олонхийг дагаж хэт хурдалж болохгүй.
Замдаа амаа зайлах төдий ганц нэг балга л ус уух хэрэгтэй.
Гүйхийн өмнөх өдөр сайн амрах хэрэгтэй.
Харин урьдчилсан бэлтгэх хийхдээ аль болох гадаа гүйх нь зүйтэй. Миний хувьд 10 км-ээс илүү гүйдэггүй. Би 6-10 км-ийн зайнд долоо хоногт хоёр удаа гүйдэг.
Анх удаа гүйх гэж байгаа хүмүүст зөвлөж хэлэхэд заавал хурдан гүйх нь чухал биш, тайван, өөрийнхөө тааваар гүйвэл "зүрх үхэхгүй" гэдгийг хэлмээр байна.
Марафоны маршрутын хамгийн эвгүй хэсэг нь туннель байдаг. Тийшээ гүйж гарахад хамаг хүч барагдчихдаг юм. Тийм болохоор хүчээ баралгүй хурдан алхаад гарвал зүгээр. 2014 онд маршрутаа сайн зохицуулаагүйгээс зарим хүн илүү, зарим нь дутуу гүйсэн тал бий.
10 км гүйхэд 700-1000 ккал шатаадаг. Тийм болохоор гүйлт бол өөх шатаах хамгийн сайн дасгал юм шүү.

Э.Лхагва

2014, 2015 онуудад “Улаанбаатар марафон”-д 21 км-ийн зайд гүйсэн

Гүйхийн өмнөх өдөр нь сайн унтаж амрах хэрэгтэй.
Урт замд гүйх гэж байгаа бол хөлөө вазилинаар тослоод даавуун оймс өмсвөл хөл шалбарахаас хамгаалдаг.
Гоймон зэрэг нүүрс ус өндөртэй хоол идэх хэрэгтэй.
Уралдааны өдөр бага юм уух, сайн халаалт хийх нь зүйтэй.
21, 42 км-ийн зайд гүйж буй хүн зогсож амарч болдоггүй юм билээ. Замдаа зогсвол шууд темп алдагдаад бие, өвдөг хөшиж байсан.
Гүйлтийн гутлаа зөв сонгох хэрэгтэй. Элэгдэж муудсан гутал хөл гэмтээх аюултай байдаг.
Яг одооноос бэлдэж эхэлж байгаа бол холын зайд гүйгээд хэрэггүй болов уу.

Г.Түвшинзаяа

“NYC Marathon”-д гүйсэн туршлагатай, мөн “Улаанбаатар марафон”-д 21 км-ийн зайд гүйсэн

Марафонд гүйхэд үндсэн бэлтгэл сургуулилт хамгийн чухал. Тэмцээнээс болохоос нэлээд хэдэн сарын өмнөөс тогтом гүйж бэлдэх хэрэгтэй. Харин уралдаанаас өмнөх хэд хоногт бэлтгэлээ багасгаж, хүчээ нөөцлөх хэрэгтэй.
Юуны өмнө маш сайн амарч, хүчээ нөөцлөх нь чухал.
Уралдааны өмнөх өдөр болон өглөө нь гоймон эсвэл цагаан талх идэж биедээ нүүрс ус хуримтлуулаарай.
Гүйж байхдаа цусан дахь чихрийн хэмжээгээ хэвийн хэмжээнд барихын тулд халаасандаа резин чихэр хийгээд хүч багасах үед идвэл зүгээр.
Энержи гелийг өмнө нь хэрэглэж байгаагүй бол уралдааны үед анх удаа хэрэглээд хэрэггүй. Тэгвэл гүйж байхдаа гүйлгэх гээд байдаг эрсдэлтэй шүү.
Уралдааны өдөр ямар нэг шинэ гутал, хувцас өмсөөд хэрэггүй. Холгоод айхтар юм болно. Бэлтгэлийн үеэр өмсөж байсан хувцсаа өмсөөрэй.
Эрэгтэй хүмүүс гүйхдээ хөхний толгойн дээрээ шархны лент наавал зүгээр. Тэгэхгүй бол футболктой холгоод хэцүү байдалд орно. Энэ тухай илүү судалъя гэвэл гүүглээс “Nipple chaffing” гээд хайгаад үзээрэй.
Өмнө нь "Гэрэг" сэтгүүлд өгсөн гүйлтийн тухай ярилцлагыг эндээс уншиж болно шүү.

Н.Энхбат

2014 онд "Говь марафон 21", 2013, 2015 онуудад "Талын марафон 21"-д оролцож байсан туршлагатай, 2013 онд “Улаанбаатар марафон”-д 10 км зайд, 2015 онд 21 км зайд гүйсэн

Тэмцээн болохоос өмнө 3-4 сарын өмнөөс бэлдэж эхэлвэл зүгээр. Огт бэлтгэлгүй гүйвэл уушиг муутай хүмүүс ухаан алдах, багтрах, амьсгаа түгжрэх, шөрмөс татах аюултай. Харин байнгийн дасгал хөдөлгөөн хийдэг, спортоор хичээллэдэг хүмүүс зүгээр.
Уралдаан болохоос өмнөх өдрүүдэд алкохол хэрэглэж болохгүй.
Анх удаа гүйж байгаа хүмүүс богино зайд гүйвэл зүгээр.
Мөн сэтгэл санаагаа тогтворжуулахын тулд гүйх үед сонсоход тохиромжтой эрч хүчтэй дуу сонсоод гүйвэл зүгээр юм билээ.
Заавал мэргэжлийн хувцас өмсөх шаардлагагүй, гол нь биед эвтэйхэн, хөнгөн байх хэрэгтэй. Кет хавтгай ултай болохоор гүйлтэд өмсөж болохгүй шүү.
Уралдааны өдөр халуун, нартай байвал гүйлтийн шил, саравчтай малгай өмсвөл зүгээр юм билээ.
Тэмцээн эхлэхээс өмнө зохион байгуулагч нараас гүйлтийн маршрутаа сайн асууж, тодруулах нь тун чухал.
Гүйж байхдаа зөвхөн амаа чийглэх зорилгоор л ус балгахгүй бол их хэмжээгээр уувал замд шээс хүрэх зэрэг хүндрэл учирч мэднэ.
Гараанаасаа огцом хурдан гаралгүй дундаж хурдаар явахгүй бол замынхаа гуравны нэгд хүрээд л ядрах аюултай.